२०८३, भाद्र ८ गते
- यो साता चर्चामा :
काठमाडौं – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले २१ औं शताब्दीको समजावदको मोडेलको खोजी गरिरहेकाहरू एकै ठाउँमा आउन जरुरी रहेको बताउनुभएको छ ।
आइतबार राजधानीमा आयोजित पुस्तक विमोचन कार्यक्रममा प्रचण्डले त्यसका लागि प्रयास पनि भइरहेको बताउनुभयो ।
विभाजित भएर केही पनि नहुने भन्दै प्रचण्डले फेरि एकै ठाउँमा आएर हेर्नुपर्नेमा जोड दिनुभयो ।
‘एक चरण विभाजित भएर हेरियो,’ नेकपा एसका अध्यक्ष माधव नेपालसमेत सहभागी कार्यक्रममा उहाँले भन्नुभयो, ‘त्यसरी लछारपाटो केही पनि लाग्नेवाला छैन । त्यसकारण फेरि एक ठाउँमा आएर हेरम् ।’
प्रचण्डले कहिलेकाहीं माओलेझैं म एक्लो छु भन्नुपर्ने अवस्था त आउने होइन भन्ने लाग्ने गरेको सुनाउनुभयो ।
कार्यक्रममा प्रचण्डले माओले पार्टीमा आफू एक्लो महसुस गरेको सम्झिनुभएको हो ।
‘संसारभर माओवादीको बिगबिगी छ, माओ माओ भनेका छन् । तर आफ्नै पार्टीभित्र माओले म एक्लो छु भन्ने के फिल गरेछन्,’ उहाँले भन्नुभयो, ‘कहिलेकाहीं मलाई पनि शायद एक दुई वर्षपछि म पनि एक्लो हुने हो कि? माओले जस्तै म पनि एक्लो छु भन्नुपर्ने हो कि? त्यस्तो चित्र दिमागमा आउँछ ।’
