काठमाडौं । नेपाली काँग्रेसका नेता गुरुराज घिमिरेले विधि र पद्धतीलाई मुल आधार मान्ने काँग्रेसले अहिले विधानको चरम उलंघन गरिरहेको टिप्पणी गर्नुभएको छ ।

उहाँले विधान नमानेपछि विधानको औचित्य पनि समाप्त भएको नेपाली रेडियो नेटवर्कसँग बताउनुभयो । “मन लागे मान्ने मन नलागे नमान्ने हो भने विधानको के औचित्य भयो ? विधान किन चाहियो ?” उहाँले प्रश्न गर्नुभयो ।

महाधिवेशन सकिएको ६ महिनामा गर्नु पर्ने नियुक्ति महाधिवेशनको मिति तय भइसकेपछि गर्नु विधानको चरम उलंघन भएको उहाँको भनाई छ ।

“एकातिर महाधिवेशन सकिएको ६ महिना पछि विभागहरु गठन गर्न मिल्दैन, अर्कातिर महाधिवेशनको मिति तोकिसकेपछि कुनै नियुक्ती गर्न मिल्दैन, तर अहिलेको नियुक्तिले विधानको दोहोरो उलंघन भइरहेको छ,” उहाँले भन्नुभयो ।

समयमै नियुक्ती गर्नका लागि सभापति शेरबहादुर देउवालाई कसैले अवरोध नगरेको दावी गर्दै उहाँले अहिले नियुक्ती गर्नु आपत्तिजनक र अस्विकार्य भएको बताउनुभयो ।

अहिले विभाग गठन गरेर उनीहरुले विभाग अनुसारको काम गर्न पनि नभ्याउने र उनीहरु सवै महाधिवेशतिर नै लाग्नु पर्ने भएकाले काम गर्नका लागि भन्दा महाधिवेशन प्रभावित पार्नका लागि यो गठन भएको प्रष्ट हुने उहाँले दावी गर्नुभयो ।

नेता घिमिरेले पार्टीका केही नेताहरुलाई प्रक्रियातग रुपमा कारबाही भएकाले असहमती जनाउन नमिले पनि व्यक्तिगत रुपमा भने आफुलाई ठिक नलागेको स्पष्ट पार्नुभयो । राप्रपाका नेता काँग्रेसमा भित्रिएको विषयलाई भने उहाँले सकारात्मक र उत्साहजनक रुपमै लिनुपर्ने बताउनुभयो ।