काठमाडौं । नेपाल राष्ट्र बैंकले हिजो सार्वजनिक गरेको मौद्रीक नीतिप्रति अर्थविद्हरुले सकारात्मक प्रतिक्रिया दिएका छन् । पूर्व अर्थसचिव डा. विमल कोइरालाले मौद्रीक नीतिले ठिकै बाटो लिएको धारणा राख्नुभयो ।

उहाँले मौद्रीक नीति जतिसुकै राम्रो भएपनि राजनीतिक अवस्था राम्रो भएन भने काम नलाग्ने भएकाले राजनीतिक नेतृत्वले ग्रहण गर्नुपर्नेमा जोड दिनुभयो ।

“राजनीतिले धेरै कुरालाई प्रत्यक्ष प्रभावित पार्दछ, त्यसमा पनि अर्थतन्त्रलाई त झन धेरै असर पार्दछ, त्यसैले सुरुमा राजनीति नै सुधार हुन आवश्यक छ,” कोइरालाले नेपाली नेटवर्कसँग भन्नुभयो ।

पूर्व मुख्य सचिव समेत रहनु भएका कोइरालाले राष्ट्र बैंकले बनाएको नीति कार्यान्वयनका लागि सवैले साथ दिनुपर्नेमा जोड दिनुभयो ।

त्यसैगरी राष्ट्र बैंकका पूर्व गभर्नर दिपेन्द्र बहादुर क्षेत्रीले पनि व्यवसायीक पुनर्उत्थानलाई प्राथमिकता दिएर मौद्रीक नीतिले सही बाटो समातेको बताउनुभयो ।

मुल्य बृद्धिको दर भने अपत्यारिलो उल्लेख गरिएको उहाँले टिप्पणी गर्नुभयो । राष्ट्र बैंकले उल्लेख गरेकोभन्दा धेरै मुख्य बृद्धि व्यवहार र बजारमा देखिएको उहाँको भनाई थियो ।