काठमाडौं । नेपाली काँग्रेसका बरिष्ठ नेता रामचन्द्र पौडेलले नेतृत्वमा रहेका कतिपय नेताहरुको आचरणका कारण नेपाली काँग्रेस कमजोर अवस्थामा पुगेको बताउनुभएको छ ।

पार्टी सभापति शेरबहादुर देउवाप्रति लक्षीत गर्दै उहाँले कतिपय व्यक्तिहरुले सत्ता र सम्पत्तिका लागि पार्टीलाई दाउमा राखेर पार्टीको दुरुपयोग गरेको आरोप पनि लगाउनुभयो ।

नेपाली रेडियो नेटवर्कको नेपाली बहसमा उहाँले भन्नुभयो, “अहिले नेतृत्व गरेका कतिपय व्यक्तिको आचारणका कारण पार्टीले नै विपिलाई छोडेजस्तो देखिएको हो, तर मुल रुपमा पार्टी विपी कै मार्गदर्शनमा छ ।”

उहाँले पार्टी कब्जा गरेर पद र मोज मस्तीमा रमाउनेहरुका विरुद्ध पार्टीमा आफ्नो लडाई भइरहेको र अडिरहने अठोट व्यक्त गर्नुभयो । निर्धारित कार्यकाल सकिएपछि पनि अधिवेशनतिर लाग्नुको सट्टा नियक्ति जारी रहेकोभन्दै उहाँले आपत्ति जनाउनुभयो ।

उहाँले भन्नुभयो, “अव अधिवेशनतिर लाग्ने हो, विभाग बनाएर प्रभावित पार्ने होइन, पार्टीमा तमासा भयो, एकातिर आँधी अर्कातिर झोलुङ्गो भनेजस्तो भइरहेको छ ।”

उहाँले अहिले विभिन्न विभागमा नियुक्त भएकाहरुप्रति लक्षित गर्दै लोभलाचलमा नलाग्न आग्रह गर्नुभयो । तपाईहरुको लोभलालचले तपाईलाई, पार्टीलाई र देशलाई नै अध्यारोमा धकेल्छ, बरिष्ठ नेता पौडेलले भन्नुभयो ।

उहाँले छलछाम, षड्यन्त्र, जे गरेर पनि पार्टीलाई कब्जा गर्ने प्रबृत्ति देखिएको आरोप लगाउनुभयो । लोकतान्त्रीक पार्टीको नेतृत्व चयन गर्दा पनि स्वस्थ प्रतिश्पर्धा हुनेमा शंका व्यक्त गर्नुभयो ।

काँग्रेसलाई सवै नेपालीको भरोसाको केन्द्र बनाउनेगरी सुधार अभियान तर्फ लाग्न पनि सवै नेता कार्यकर्ताहलाई बरिष्ठ नेता पौडेलले आह्वान गर्नुभयो ।