बुटवल । लगातारको वर्षापछि खसेको पहिरोका कारण अवरुद्ध बनेको सिद्धार्थ राजमार्ग अन्तरगतको बुटवल–तानसेन सडक खण्ड पन्ध्र घण्टापछि सञ्चालनमा आएको छ । तानसेन नगरपालिका–८ मा पर्ने गौडेपुल नजिकै गएराति आठ बजे पहिरो खसेपछि सडक अवरुद्ध भएको थियो ।

आज बिहानदेखि दुईवटा एक्साभेटर र लोडरले पहिरो हटाएपछि आज दिउँसोदेखि सवारी साधन चल्न थालेका जिल्ला प्रहरी कार्यालय पाल्पाका प्रवक्ता प्रहरी नायब उपरीक्षक मदन गिरीले जानकारी दिनुभयो ।

उक्त स्थानमा एक सातादेखि पहिरो खस्न शुरु भएको थियो । शुक्रबार राति ठूलो मात्रामा खसेको पहिरोले दुई दिन सवारी साधन सञ्चालन सकेको थिएन भने पैदल यात्रासमेत ठप्प भएको थियो ।

हिजो सडक खुलेको तीन घण्टापछि पुनः पहिरो खसेर सडक अवरुद्ध भएको थियो । बीचबाटोमै रोकिएका सवारीसाधान सडक खुलेसँगै गन्तव्यतर्फ लागेका डीएसपी गिरीले बताउनुभयो ।