काठमाडौं । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले देशभरका विद्यालय नभई कोरोनाभाइरसको संक्रमण दर उच्च रहेका स्थानका शैक्षिक संस्था बन्द गर्ने बताउनुभएको छ ।

उहाँले काठमाडौं, भक्तपुर, ललितपुर, पोखरा, विरगंजलगायतका ठाउँमा कोरोना संक्रमण दर उच्च रहेकाले ती ठाउँका शैक्षिक संस्था बन्द गर्नुपर्ने अवस्था आउनसक्ने प्रष्ट पार्नुभएको छ ।

कोरोनाभाइरसको संक्रमण भयावह बन्न सक्ने भन्दै शैक्षिक संस्था बन्द गर्नेबारे सोचको उहाँले बताउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै डा.गौतमले कोरोनाको दोस्रो चरणको संक्रमण किशोरकिशोरी समूहमा बढी देखिएकाले पनि शैक्षिक संस्था बन्द गर्नेबारे सरकार अग्रसर बनेको उल्लेख गर्नुभयो ।

सरकारले निर्धारण गरेका स्वास्थ्य मापदण्डहरुको पालना नगर्ने व्यक्तिहरुलाई कारबाही गरिने पनि उहाँले जानकारी दिनुभएको छ ।

डा.गौतमले बाहिर निस्कदा मास्कको अनिवार्य प्रयोग, बेला बेला स्यानिटाइजरको प्रयोग गर्न पनि अनुरोध गर्नुएको छ ।