काठमाडौं । उद्योग, वाणिज्य तथा आपूर्ति मन्त्री तथा नेकपा एमालेका नेता लेखराज भट्टले प्रचण्ड देशको सिर्जना गर्नेभन्दा बढी विध्वंश मच्चाउन केन्द्रीत रहेको आरोप लगाउनुभएको छ ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै उहाँले प्रचण्ड देशको हितलाईभन्दा बढी अन्य विषयलाई महत्व दिन थालेको आरोप लगाउनुभयो ।

उहाँले आफुले प्रचण्डलाई नभई बरु प्रचण्डले आफुलाई छाडेको दावी गर्नुभएको छ ।

उहाँले भन्नुभयो,“पार्टी एकता गरौं भन्ने प्रस्ताव पनि प्रचण्ड जीको थियो हामीले समर्थन ग¥यौं, अनि अहिले एक बनीसकेको पार्टीलाई अलग बनाउन पनि उहाँकै भुमिका देखिएकाले मैले समर्थन गर्न सकिँन ।”

मन्त्री भट्टले देशको हितका लागि प्रधानमन्त्री केपी शर्मा ओलीलाई साथ दिएको स्पष्ट पार्नुभएको छ । उहाँले पद बिशेषमा केन्द्रीत नरहेर देशको सर्वोपरी हितका लागि ओलीलाई साथ दिएको जानकारी दिनुभयो ।

सबैले आफ्ना–आफ्ना कमीकमजोरी औंल्याएर फेरि पनि पार्टी एकतामा जुट्नुपर्ने मन्त्री भट्टको भनाइ छ ।