काठमाडौं । प्रदेश–१ को प्रदेशसभा बैठक राख्नेबारे नेकपाका दुई समूहबीच सहमति जुट्न सकेन । आजको बैठकअघि दुई समूहका नेताहरु वार्तामा बसेका थिए । तर, आ–आफ्नो अडान छोड्न नमानेपछि बिना सहमति नेताहरु उठेका छन् ।

ओली समूहका नेताहरुले आज निर्धारित बैठक सूचना टाँसेर स्थगित गर्ने र छलफल अगाडि बढाउने प्रस्ताव राखेका थिए । तर, प्रचण्ड–माधव समूहका नेताहरुले कम्तीमा पनि आज बैठक राखेर मुख्यमन्त्रीविरुद्धको अविश्वासको प्रस्ताव पेश गरिनुपर्ने अडानमा कायमै रहेका छन् ।

बैठक १८ दिन स्थगित भइसकेकाले अब मुख्यमन्त्री शेरधन राईविरुद्ध परेको अविश्वासको प्रस्ताव टेबल गरेर अगाडि बढ्नुपर्ने अडान आफूहरुले राखेको वार्तामा सहभागी प्रचण्ड–माधव समूहका नेता राजेन्द्र राईले बताउनुभयो ।

तर, यसमा ओली समूह तयार नभएको उहाँले बताउनुभयो । दुवै समूह अडानमा कायमै रहेपछि वार्ता बिना निष्कर्ष सकिएको छ ।

बैठक बस्नेबारे कार्यव्यवस्था परामर्श समितको बैठकमा पनि दुवै समूहले यही अडान राखेका छन् । कुरा मिल्न नसक्दा दुई बजे बोलाइएको प्रदेशसभा बैठक बस्न सकेको छैन ।