पाल्पा।  भोटेकोशीमा आएको भीषण बाढीका कारण प्रभावित पाल्पावासीका परिवारलाई नेपाली काङ्ग्रेस पाल्पाले घरघरमै पुगेर आर्थिक सहयोग तथा सान्त्वना प्रदान गरेको छ। विपद्का कारण ज्यान गुमाएका तथा सम्पर्कविहीन भएका नागरिकका शोकसन्तप्त परिवारजनलाई "हामी तपाईंकै साथमा छौँ" भन्ने विश्वास दिलाउँदै ढाढस दिन पार्टी नेतृत्व स्वयं पीडितका बस्तीमा पुगेको हो।

 

नेपाली काङ्ग्रेस पाल्पाका सभापति हिमालदत्त श्रेष्ठका अनुसार बाढीमा परी निधन भएका तथा बेपत्ता भएका नागरिकका परिवारलाई तत्कालको गर्जो टार्न आवश्यकता हेरेर खाद्यान्नसहित प्रतिपरिवार १० हजार रुपैयाँ नगद राहत उपलब्ध गराएको छ। साथै, सम्पर्कविहीन रहेकाहरूको शीघ्र र सकुशल खोजी तथा उद्धारका लागि काङ्ग्रेसले सम्बन्धित सरकारी निकायहरूसँग निरन्तर समन्वय र दबाब बढाइरहेको सभापति श्रेष्ठले जानकारी दिनु भएको छ।

 

बाढीमा परी बेपत्ता भएका रामपुर नगरपालिका–७ निवासी युवराज (रामु) सोती र अमृत सोतीका परिवारलाई पार्टी तथा नेपाल महिला सघ रामपुर नगर समितिको संयुक्त पहलमा २० हजार रुपैयाँ आर्थिक सहयोग गरिएको छ। पार्टीका रामपुर नगरसभापति नेत्र भट्टराईका अनुसार नेपाली काङ्ग्रेस पाल्पाको तर्फबाट १० हजार र नेपाल महिला सङ्घ रामपुरको तर्फबाट १० हजार रुपैयाँ गरी २० हजार रुपैया प्रदान गरिएको हो।

 

महिला सङ्घ रामपुरकी सभापति शारदा पौडेलले संकटको घडीमा परिवारलाई सानो भए पनि राहत र आडभरोसा मिलोस् भन्ने भावनाले सहयोग जुटाइएको बताउनुभयो। त्यसैगरी बाढीमा परी कर्तव्यपालनकै क्रममा ज्यान गुमाउनुभएका तानसेन नगरपालिका–१० का नेपाल प्रहरीका प्रहरी सहायक हवल्दार स्वर्गीय दीपेन्द्र विष्टको परिवार तथा रैनादेवी छहरा गाउँपालिका–१ सिद्धेश्वरका सम्पर्कविहीन आनबहादुर कुमालको परिवारलाई समेत घरमै पुगेर नगद तथा खाद्यान्न सहयोग प्रदान गरिएको काङ्ग्रेस पाल्पाका उपसभापति ज्ञानबहादुर गाहाले जानकारी दिनुभयो।

 

गत भदौ १० गते भोटेकोशीमा आएको भीषण बाढीमा पाल्पाका ११ जना नागरिक परेका थिए, जसमध्ये एक जनाको जीवितै उद्धार गरिएको छ भने प्रहरी सहायक हवल्दार दीपेन्द्र विष्टको शव फेला परेर अन्त्येष्टि गरिसकिएको छ। अझै ९ जना सम्पर्कविहीन रहेको अवस्थामा काङ्ग्रेस पाल्पाले देखाएको यो मानवीय सक्रियता र घरदैलोमै पुगेर दिएको सान्त्वनाले पीडित परिवारमा संकटसँग जुध्ने ठूलो आँट भरोसा सञ्चार गरेको छ।