काठमाडौं । आज बैशाख ७ गते । अर्थात बुटवलको जितगढीमा नेपाल–अंग्रेजका बीचमा भएको युद्धमा नेपालले विजय हासिल गरेको दिनको खुशीयालीमा जितगढी उत्सव मनाईँदै छ ।

१८७२ वैशाख ७ गते जितगढी किल्लामा कर्णेल उजिरसिंह थापा नेतृत्वको नेपाली फौजले अंग्रेज फौजमाथि जित हासिल गरेको खुसीयालीमा हरेक वर्ष विजय उत्सव मनाउने क्रममा आज पनि विजय उत्सव मनाउन लागिएको हो । बुटवल उपमहानगरपालिकाले प्रत्येक वर्ष विजय प्राप्त गरेको खुसीयालिमा विभिन्न कार्यक्रम आयोगजना गर्दै आएको छ ।

उपमहानगरका प्रमुख खेलराज पाण्डेले जितगढी पर्वलाई राष्ट्रिय पर्वका रुपमा मनाउनु पर्ने बताउनुभएको छ । नेपाली रेडियो नेटवर्कको नेपाली बहसमा पत्रकार खेम बमसँग कुराकानी गर्दै उहाँले कर्णेल उजिरसिंह थापालाई राष्ट्रिय विभूति घोषणा गर्नु पर्नेमा जोडदिनुभएको छ ।

यस वर्ष पनि उपमहानगरपालिकाले एक विशेष कार्यक्रमको आयोजना गरी जितगढी उत्सव मनाउँदैछ । कार्यक्रममा लुम्बिनी प्रदेशका मुख्यमन्त्रीको पनि उपस्थिति रहने छ । आज जितगढी उत्सवका अवसरमा जितगढी उत्सव मूल समारोह, गोरखादेखि पैदलयात्रामा आएको नेपाली सेनाको टोलीलाई स्वागत तथा पैदल यात्रा समापन कार्यक्रम रहेको उपमहानगरका प्रमुख  पाण्डेले जानकारी दिनुभयो ।

गणेश मन्दिर नजिकैबाट बाजागाजासहित शुरु हुने पैदलयात्रीसहितको विजय¥याली जितगढी किल्लामा पुगेर समापन हुने छ । त्यसपछि विभिन्न कार्यक्रमहरुको आयोजना गरिएको छ ।