काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादीसँग निर्वाचन प्रणाली र संविधान संशोधनको स्पष्ट धारणा रहेको बताउनु भएको छ। नेपाल मतदाता अधिकार मञ्चले प्रचण्डलाई निर्वाचनसम्बन्धी कानुन संशोधन र एकीकरण गर्न बनेको विधेयकमा सुझावसहित ध्यानाकर्षण पत्र बुझाएपछि यस्तो बताउनु भएको हो ।

पेरिसडाँडामा आएका प्रतिनिधिसँगको भेटमा प्रचण्डले निर्वाचन प्रणालीमा आवश्यक परिवर्तनका लागि माओवादी केन्द्रले निरन्तर आवाज उठाउँदै आएको बताउनुभयो ।

मतदाता अधिकार मञ्चले उठाएका मुद्दाहरू सकारात्मक रहेको उल्लेख गर्दै, यस्ता मागहरू केवल सुझाव पत्रमार्फत नेताहरूलाई बुझाएर मात्र पूरा नहुने उहाँको भनाई थियो । जनताका माग र मुद्दा स्थापित गर्न आवश्यक परे सडक संघर्षमा जान पनि तयार रहेको प्रचण्डले बताउनुभयो ।

मतदाता अधिकार मञ्चले निर्वाचन प्रणालीमा सुधार, प्रतिनिधित्वको समावेशीकरण र मतदाताको अधिकार सुनिश्चित गर्ने सम्बन्धमा विभिन्न मागहरू अध्यक्ष प्रचण्डसमक्ष पेस गरेको छ ।