काठमाडौँ । नेपाली कांग्रेसका केन्द्रीय सदस्य तथा प्रभावशाली नेता डा चन्द्र भण्डारीले पार्टी सभापति शेरबहादुर देउवाले हँसिया धेरै बनाए पनि घाँस काट्न नसकेको टिप्पणी गर्नुभएको छ। पार्टीको केन्द्रीय कार्यालय सानेपामा जारी केन्द्रीय समितिको बैठकमा उहाँले सभापति देउवाले पार्टीका धेरै जनालाई पद र जिम्मेवारी दिएपनि उनीहरूबाट काम नभएको भन्ने प्रतीकात्मक व्याख्या गर्नुभएको हो।

सभापति देउवा अब प्रधानमन्त्री वनेपछिका काम र निर्णय के गर्ने भन्ने विषयमा पर्याप्त पूर्व तयारी हुनुपर्नेमा उहाँले जोड दिनुभयो। नेता भण्डारीले पार्टीको प्रशिक्षण कार्यक्रमलाई धेरै सुधार्नुपर्नेमा ध्यानाकर्षण गराउँदै प्रशिक्षणका विषय र पात्रहरू परिवर्तन गर्न सुझाव दिनुभयो।

पार्टीको भातृ संगठनमा निर्वाचन हुन नदिएर मनोनित गर्दा कामकाजी हुन नसकेको उल्लेख गर्दै उहाँले भन्नुभयो “समिति आफूले बनाउने चलाउन अर्कालाई दिने गर्दा काम लाग्न सकेनन्।“

पार्टीका नेताहरूका बीचमा द्वन्द हुँदा हाँसेर रमिता हेर्ने भन्दा पनि मिलाउने तर्फ लाग्नुपर्नेमा उहाँले जोड दिनुभयो। सीमान्तकृत वर्गले सेयर पाउने गरी ल्याइएको जलस्रोत नीतिलाई पार्टीले अपनत्व लिनुपर्ने बताउँदै उहाँले यो नीतिबाट देशको गरिबी निवारणमा ठूलो योगदान पुग्ने दाबी गर्नुभयो।
नेता भण्डारीले आगामी निर्वाचनलाई नकारात्मक असर नपर्ने गरी पार्टीको महाधिवेशन गर्नुपर्नेमा जोड दिनुभयो ।

“सामाजिक सञ्जालमा उठेका विषयवस्तुलाई हामीले नजिकबाट नियाल्ने र सुन्ने गर्नुपर्छ, हाम्रा तिनै तहका सरकारका काम कारबाहीलाई निर्मम समीक्षा गरेर सुधारतर्फ लाग्नुपर्छ“ केन्द्रीय सदस्य भण्डारीले भन्नुभयो । उहाँले राष्ट्रपति र उपराष्ट्रपति भइसकेका व्यक्ति पार्टीको रसिद काटेर फर्किदा राजनीति प्रतिको वितृष्णा र आलोचना अझ बढ्ने भन्दै चिन्ता व्यक्त गर्नुभयो। निजामती विधेयक पारितका क्रममा देखेको त्रुटी कुनै एउटा व्यक्तिको नभई सबै सांसदको भएको तर्क गर्दै उहाँले यसको जिम्मेवारी सबैले लिनुपर्नेमा जोड दिनुभयो।

नेता भण्डारीले विद्यालय शिक्षा विधेयक, युवाशक्तिको पलायन, कृषकलाई मल बिउ लगायत अनुदान, रूपन्देही र मनाङमा हुने उपनिर्वाचन लगायतका विषयमा पनि धारणा राख्नुभएको थियो।