काठमाडौं । नेपाली कांग्रेसका महामन्त्री गगन थापाले वर्तमान सरकारको गतिकाबारे गम्भीर समीक्षा जरुरी रहेको बताउनु भएको छ । शुक्रबार विराटनगर विमानस्थलमा सञ्चारकर्मीसँग कुरा गर्दै थापाले ठूला दुई दल मिलेर बनेको वर्तमान सरकारले अपेक्षित परिणाम दिन नसकेको उल्लेख गर्नुभयो ।

उहाँले सरकारलाई प्रभावकारी रुपमा अघि बढाउन चाँडै केन्द्रीय कार्यसमितिको बैठकले ठोस निर्णय गर्नेसमेत बताउनुभयो । त्यसैगरी महामन्त्री थापाले पतञ्जलि जग्गा प्रकरणमा अदालतको आदेश पर्खनुको विकल्प नभएको उल्लेख गर्नुभएको छ। संवैधानिक निकायले कानुनअनुसार मुद्दा दर्ता गरेको र अदालतमा गएको विषय भएकाले अदालतलाई विश्वास गर्नुपर्ने उहाँको भनाई छ ।

वर्तमान सरकार गठनका समयमा भएको सहमतिअनुसार संविधन संशोधनसम्बन्धी समिति बनाउन ढिलाइ भएको उल्लेख गर्दै थापाले चाँडै नै समिति बनाएर संविधान संसोधनको एजेण्डा टुङ्गो लगाई प्रक्रियामा लैजाने बताउनुभयो ।

महामन्त्री थापाले ०८३ सालको मंसिरमा महाधिवेशन हुने गरी पार्टी सदस्यता लगायत विषयहरूमा काम गरिरहेको बताउनु भएको छ ।