२०८३, भाद्र ९ गते
- यो साता चर्चामा :
काठमाडौं । गृहमन्त्री रमेश लेखकले भिजिट भिसा प्रकरणबारे आज आफ्नो धारणा सार्वजनिक गर्नुभएको छ । संसद्मार्फत जवाफ दिने तयारि गर्नुभएका गृहमन्त्री लेखकले विपक्षी दलहरुको अवरोधका कारण जवाफ दिन पाउनुभएको छैन । संसद्मा जवाफ दिन नपाउनु भएका गृहमन्त्री लेखकले आज पत्रकार सम्मेलन मार्फत भिजिट भिसा प्रकरणबारे आफ्नो धारणा राख्दै आफ्नो कुनै संलग्नता नरहेको दाबी गर्नुभएको छ । गृहमन्त्री लेखकले आफूविरुद्ध राजनीतिक पूर्वाग्रहका आधारमा षड्यन्त्र भएको बताउनुभयो ।
‘सबैभन्दा पहिलो जसरी यो विषय (भिजिट भिसा) मा मेरो संलग्नता देखाएर सामाजिक सञ्जालमार्फत धारणा भएका छन् । यो असत्य कुरा हुन्, यो बेठिक कुरा हो । यसमा मेरो कुनै संलग्नता छैन,’ गृहमन्त्री लेखकले भन्नुभएको छ । साथै, उहाँले आफूविरुद्ध नियोजित र षड्यन्त्रपूर्वक ढंगबाट आक्रमण भएको बताउनुभएको छ । गृहमन्त्री लेखकले भिजिट भिसा प्रकरणमा अख्तियारको छानवीनमा परेका त्रिभुवन विमानस्थल अध्यागमन कार्यालयका निर्देशक तीर्थ भट्टराईलाई गृह मन्त्रालयमा आफूले नल्याएको पनि प्रष्ट पार्नुभएको छ ।
गृहमन्त्री लेखकले भट्टराईलाई आफूले नै गृह मन्त्रालयमा ल्याएर उक्त ठाउँमा पठाएको जस्तो प्रचार गरिएको भन्दै उहाँले विगत ५ वर्षदेखि भट्टराई गृह अन्तर्गत नै रहेको दाबी गर्नुभयो । मन्त्री लेखकले भिजिट भिसा प्रकरणमा जोडिएका सहसचिव भट्टराईलाई अख्तियारले सोधपुछ गरेको कुरा सञ्चारमाध्यमबाट थाहा पाएको बताउँदै उहाँले अख्तियारले गर्ने छानबिनलाई सहयोग गर्ने बताउनुभएको छ ।
गृहमन्त्री लेखकले प्रश्न उठ्नबित्तिकै राजीनामा दिनुपर्ने थिति बसाल्न नहुने बताउनुहुन्छ । आफूले गर्दै नगरेको अपराधमा मुछ्न खोजिएको गुनासो गृहमन्त्रीको छ । यता, आजै बालुवाटारमा कांग्रेसका शीर्ष नेतृत्वसहित प्रधानमन्त्रीको छलफलले गृहमन्त्रीको राजीनामा असम्भव रहेको निचोड निकालेको छ । प्रधानमन्त्रीसँगको छलफलमा कांग्रेस सभापति शेरबहादुर देउवा, उपसभापति पूर्णबहादुर खड्का, गृहमन्त्री रमेश लेखक साथै एमालेबाट मुख्य सचेतक बर्तौला हुनुहुन्थ्यो ।
नेकपा एमालेका मुख्य सचेतक महेश बर्तौलाले गृहमन्त्री रमेश लेखकलाई प्रतिपक्षी दलहरूले संसद्मा बोल्न नदिनुलाई असंसदीय व्यवहार भएको बताउनुहुन्छ । प्रतिपक्षी दलहरूले उठाएकै विषयवस्तुबारे जवाफ दिन गृहमन्त्री लेखक तयार भए पनि प्रतिपक्षी दलहरूले संसद्मा अवरोध सिर्जना गरेर नाकाबन्दी लगाउने काम भएको दाबी मुख्य सचेतक महेश बर्तौलाको छ ।
यसैगरि, कांग्रेस सांसद अर्जुन नरसिंह केसी प्रतिपक्षीले गृहमन्त्रीलाई संसद्मा बोल्न दिनुपर्नेमा जोड दिनुहुन्छ । आफुमाथि लागेका आरोपको खण्डन गर्न गृहमन्त्रीले पाउनुपर्ने तर्क उहाँको छ ।
हिजो र आज प्रतिनिधीसभा बैठक अवरुद्ध हुँदा भोलि आउने बजेट भाषण के हुन्छ भन्ने जिज्ञासा पनि सवैमा छ । प्रतिपक्षमा रहेका राजनीतिक दलहरू भिजिट भिसा प्रकरणमा मुछिएका गृहमन्त्री लेखकको राजीनामा नआउँदासम्म सदन चल्न नदिने अडानमा छन् । तर, बजेटका विषयमा भने सकारात्मक छन् ।
नयाँ बानेश्वरस्थित संघीय संसद् भवनमा रहेको प्रमुख प्रतिपक्षी दलका नेता नेकपा माओवादी केन्द्रका अध्यक्ष पुष्कपमल दाहाल ‘प्रचण्ड’को च्याम्बरमा बसेको प्रतिपक्षी दलको बैठकले यस्तो निर्णय गरेको हो । उक्त बैठकले बजेटका विषयमा भने सकारात्मक हुने पनि निर्णय गरेको छ । राष्ट्रिय स्वतन्त्र पार्टी (रास्वपा) ले भोलि संसद्मा बजेट प्रस्तुत हुन दिने भएको छ । कार्यबाहक प्रवक्ता मनीष झाले बजेट प्रस्तुत हुँदा अवरोध नगर्ने बताउनुहुन्छ ।
संवैधानिक व्यवस्था बमोजिम भोलि (१५ जेठमा) प्रस्तुत हुनुपर्ने आर्थिक वर्ष २०८२-०८३ को बजेट प्रस्तुत हुन दिने रास्वपा नेता झाको भनाई छ । विपक्षी दलहरुले गृहमन्त्री रमेश लेखकको राजीनामा र भिजिट भिषा प्रकरणमाथि छानबीनको माग राखेर संसद् अवरोध गरिरहेका छन् । तर, सरकारले भोलि बस्ने संघीय संसद्को संयुक्त बैठकमा आगामी आर्थिक वर्षको बजेट प्रस्तुत गर्ने भएको छ । भिजिट भिसा प्रकरणमा गृहमन्त्रीको राजीनामा माग्दै मंगलबारदेखि सदन अवरुद्ध गरेका विपक्षी दलहरूले बजेट ल्याउन भने दिने भएका हुन्।
सत्तापक्ष र प्रतिपक्षबीच गृहमन्त्री लेखकबारे सहमति जुट्न नसकेका कारण हिजो र आज प्रतिनिधीसभा अवरुद्ध हुन पुग्यो । अवरुद्ध भएकै कारण गृहमन्त्री लेखकले आज पत्रकार सम्मेलन मार्फत भिजिट भिसा प्रकरणबारे आज आफ्नो धारणा सार्वजनिक गर्नुभएको हो ।
