२०८३, भाद्र १८ गते
- यो साता चर्चामा :
काठमाडौं । कक्षा १२ को परीक्षा आजबाट शुरु भएको छ । कोरोना संक्रमण जोखिमका कारण गत वैशाखमा हुन नसकेको परीक्षा आजबाट शुरु भएको हो ।
परीक्षामा देशभरका ४ लाख ३२ हजार ५ सय विद्यार्थीहरु सहभागी भएका छन् । देशभर ४ हजार १ सय ५ विद्यालयमा परीक्षा केन्द्र तोकी परीक्षा सञ्चालन गरिएको छ ।
राष्ट्रिय परीक्षा बोर्डले यसपटक ४० प्रतिशत अंकका लागि मात्र परीक्षा लिन लागेको हो । बोर्डका अनुसार थप ४० प्रतिशत अंक कक्षा ११ को नतिजाको मूल्याङ्कन गरेर र २० प्रतिशत अंक विद्यालयको आन्तरिक मूल्यांकनबाट जोडिने छ ।
परीक्षा बिहान ८ बजेदेखि शुरु भएको थियो । यसपटक विद्यार्थीहरुले आफैले पढेको विद्यालयमा परीक्षा दिन पाएका छन् । यस्तै गाउँघरमा गएका विद्यार्थीहरुले भने आफुलाई पायक पर्ने स्थानमै रहेको परीक्षा केन्द्रबाट परीक्षा दिन पाउने व्यवस्था पनि गरिएको छ ।
राष्ट्रिय परीक्षा बोर्डका उपाध्यक्ष समेत रहेका शिक्षा, विज्ञान तथा प्रविधि मन्त्रालयका सचिव गोपीनाथ मैनालीले सबै परीक्षा केन्द्रमा जनस्वास्थ्य मापदण्ड पालना गरी परीक्षा सञ्चालन भएको बताउनुु भएको छ ।
यस्तै अनुगमनका क्रममा परीक्षा केन्द्रहरुमा परीक्षा बोर्डले जारी गरेको परीक्षा मापदण्ड समेत पालना भएको पाइएको सचिव मैनालीको भनाई छ ।
यसैबिच, शिक्षा मन्त्री गिरिराजमणि पोख्रेलले कक्षा १२ को परीक्षा सहज रुपमा सन्चालन भएको भन्दै खुसी व्यक्त गर्नुुभएको छ ।
काठमाडौं उपत्यकाका परीक्षा केन्द्रहरुको आज बिहान अनुगमन गर्दै मन्त्री पोखरेलले चुस्त व्यवस्थापनका कारण परीक्षा सहजरुपमा भएको बताउनुु भएको हो ।
परिक्षा केन्द्रहरुमा धारामा साबुन पानी, सेनिटाइजरको व्यवस्था पनि गरिएको छ । हरेक कक्षा कोठा स्यानिटाइज्ड गरिएको छ । कक्षा कोठामा एउटा बेन्चमा एक जनामात्रै परीक्षालाई बस्ने व्यवस्था मिलाइएको छ ।
