काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले वर्तमान सरकार भ्रष्टाचारीहरूलाई जोगाउनका लागि बनेको आरोप लगाउनुभएको छ । आज वीरगन्जमा सञ्चारकर्मीहरूसँग कुरा गर्दै उहाँले आफ्नो नजरमा प्रधानमन्त्री केपी शर्मा ओली नेतृत्वको सरकार नराम्रो काम गर्नका लागि बनेको बताउनुभयो ।

अहिलेको सरकार भ्रष्टाचारीहरूलाई जोगाउने र नराम्रो गर्नेलाई पुरस्कृत गर्ने काम गरिरहेको बताउँदै भ्रष्टाचारी जोगाउने, बेथिति बढाउने, अराजकता बढाउने काम प्रधानमन्त्री ओलीले गरिरहेको आरोप लगाउनुभयो । २०८४ सम्म आफू प्रधानमन्त्री हुने दौडमा नरहने उहाँको जिकिर छ । आफू २०८४ सम्म जनताकै साथमा रहने उहाँको भनाइ छ ।

सरकारमा हुँदा एउटा र प्रतिपक्षमा हुँदा अर्को भन्ने कुरा माओवादीमा लागू नहुने भन्दै उहाँले सरकारमा हुँदा आफूले भ्रष्टाचारविरुद्धको आन्दोलन छेडेको दाबी गर्नुभयो । आर्थिक विकासको निम्ति गति दिने कुरामा आफूहरूले सरकारमा हुँदा जोड दिएको र आफू नेतृत्वको सरकार भ्रष्टाचारीहरूले हटाएको दाबी गर्नुभयो ।