काठमाडौं । प्रधानमन्त्री केपी शर्मा ओलीले उत्पादन, उत्पादकत्व र उद्यमशीलता वृद्धि गरी गरिबी निवारणलाई पहिलो प्राथमिकतामा राख्न राष्ट्रिय योजना आयोगका पदाधिकारीलाई निर्देशन दिनुभएको छ ।

आयोगको कार्यसम्पादन र भावी कार्यदिशाका विषयमा आज प्रधानमन्त्री तथा मन्त्रिपरिषद्को कार्यालय, सिंहदरबारमा उपाध्यक्षसहित पदाधिकारीसँगको छलफलमा आयोगका अध्यक्षसमेत रहेका ओलीले पूर्वाधार विकासका काम लगभग पूरा हुने चरणमा रहेको बताउनुभयो ।

उहाँले अब सीप विकास, उद्यमशीलता, रोजगारीका अवसर सृजना, कृषि क्षेत्रका ठुला उत्पादन र लगानी वृद्धि गर्न आग्रह समेत गर्नुभएको छ ।

सरकारले जनतालाई सबल बनाउने बाटो लिनुपर्ने बताउँदै प्रधानमन्त्री ओलीले जनतालाई कर्मशील बनाउन प्रेरित गर्नुपर्ने बताउनुभयो । उत्पादकत्व बढेपछि अर्थतन्त्रमा सकारात्मक प्रभाव पर्ने तर्क गर्नुभयो । राष्ट्रिय गौरवका आयोजनाको प्रभावकारी अनुगमन–मूल्याङ्कन, उद्यमशीलताको विकास र जनताको सेवा प्रवाह एवं सुशासनमा सकारात्मक प्रभाव पर्ने काममा लाग्न आग्रह गर्नुभयो ।

आयोगका उपाध्यक्ष प्रा डा. शिवराज अधिकारीले १६ औँ योजनाको कार्यान्वयन, यसका चुनौतीहरू, राष्ट्रिय आयोजना बैँकको नयाँ मापदण्ड र परिमार्जन, अधुरा योजनमाथिको व्यवस्थित विश्लेषण, परियोजना विश्लेषणको नयाँ मापदण्ड, समपुरक र विशेष अनुदानको कार्यविधिमा संशोधनबारे समेत धारणा राख्नुभएको थियो ।