काठमाडौं । पूर्वराजा ज्ञानेन्द्र शाहका पछिल्ला गतिविधीवारे आजको प्रतिनिधीसभा बैठकमा सांसद्हरुले सरकारको ध्यानाकर्षण गराएका छन् । विपक्षी दलहरुले वर्तमान सरकारका कारण लोकतन्त्र खतरामा परेको आरोप पनि लगाएका छन् ।

नेपालका जनता जहिले पनि लोकतन्त्रको पक्षमा रहेको तर, लोकतन्त्र ठुला पार्टीका नेताबाट खतरामा परेको टिप्पणी प्रतिनिधीसभामा भएको छ । नेकपा माओवादी केन्द्रका अध्यक्ष पुष्पकमल दाहाल प्रचण्डले संसद् बैठकलाई सम्वोधन गर्दै पूर्वराजा ज्ञानेन्द्र शाहलाई चेतावनी दिनुभयो । संसद् बैठकमार्फत प्रचण्डले लोकतन्त्रभित्रै आफ्नो ठाउँ खोज्न राजावादीहरूलाई आग्रह गर्नुभएको छ ।

लोकतन्त्र जति प्रचण्डको हो त्यति नै ज्ञानेन्द्र शाहको पनि भएको र यही भाव संविधानमा रहेको प्रचण्डको भनाई छ । प्रचण्डले जनताको बलिदानबाट प्राप्त उपलब्धलाई उल्ट्याउन कोसिस भइराखेको बताउनुभयो ।

सत्तारुढ र सरकारकै कारण मुलुकमा प्रतिगामी र राजावादीहरूको चलखेल हुनुका साथै जनता समेत असन्तुष्ट रहेको भन्दै अध्यक्ष प्रचण्डले सरकारको आलोचना गर्नुभयो । सरकार र राजावादीविरुद्ध एकैसाथ जुध्नुपर्ने स्थिति सिर्जना भएको प्रचण्डको भनाई छ ।

नेपाली कांग्रेसका महामन्त्री गगनकुमार थापा संविधान विपरीत हुने कुनै पनि षड्यन्त्रविरुद्ध सबै दल एक भएर अघि बढ्नुपर्ने बताउनुहुन्छ । प्रतिनिधिसभाको विशेष समयमा बोल्दै महामन्त्री थापाले विभिन्न कारणले जनता आक्रोशित भएको भन्दै एकताबद्ध भएर समस्याको समाधान खोज्नुपर्नेमा जोड दिनुभयो ।

२०६२-०६३ को जनआन्दोलनमा साथ दिएको नागरिक पंक्ति पनि यतिबेला असन्तुष्ट रहेकोले नेतृत्वले अव सुध्रिनु पर्ने र जनताको कुरा सुनेर अगाडि बढ्नु पर्ने बेला आएको थापाको भनाई छ ।

नेकपा एमालेले पूर्वराजा ज्ञानेन्द्र शाहका पछिल्ला गतिविधिहरू संविधान विरोधी रहेको भन्दै प्रतिनिधीसभामा आपत्ति जनाएको छ । पार्टीका प्रमुख सचेतक महेश बर्तौलाले पूर्वराजाको उक्साहट र निर्देशनमा पञ्चायतकालीन राष्ट्रिय गान गाउन थालिएको भन्दै आक्रोश व्यक्त गर्नुभयो ।

बर्तौलाले संविधानको धारा १ मा ‘संविधानको पालना गर्नु प्रत्येक व्यक्तिको कर्तव्य हुने’ उल्लेख गरिएको स्मरण गराउनुभयो । राष्ट्रिय प्रजातन्त्र पार्टी (राप्रपा)ले पूर्वराजाको नामबाट संसद् तरंगित हुनु खुसीको कुरा भएको प्रतिकृया दिएको छ ।

सांसद ध्रुवबहादुर प्रधानले संविधानमा व्यवस्था परिवर्तन नहुने भन्ने कुरा नरहेको भन्दै अहिलेको वर्तमान व्यवस्थाले देशको संरक्षण गर्न नसक्ने जिकिर गर्नुभयो । राप्रपाका अर्का सांसद रोशन कार्कीले गत २५ फागुनमा काठमाडौंमा पूर्वराजा ज्ञानेन्द्र शाहको समर्थनमा देखिएको भिड ‘ट्रायल’ मात्रै भएको बताउनुभएको छ ।

उहाँले अरु ७३ जिल्लाका मान्छे यसैगरी उत्रिएको खण्डमा गणतन्त्रका नेताहरूलाई लुक्ने ठाउँ समेत नहुने टिप्पणी गर्नुभयो । राष्ट्रिय प्रजातन्त्र पार्टी (राप्रपा) ले संसद्बाटै पूर्वराजाको पक्षमा सरकारलाई चुनौति दिईरहेको अवस्था छ । यता, राजावादीका गतिविधि नियन्त्रण अन्य दलले सदनमार्फत माग गरिरहेका छन् । राष्ट्रियसभा र प्रतिनिधीसभामा सांसदहरुले सरकारको ध्यानाकर्षण गराईराखेका छन् । यस्तो बेला तत्काल समाधान खोज्न सरकार र दलहरुले ढिलाई गर्नु हुँदैन ।