काठमाडौं । गृहमन्त्री रमेश लेखकले प्रतिनिधिसभामा सशस्त्र प्रहरी बल नेपाल विधेयक २०८१ माथि विचार गरियोस् भन्ने प्रस्ताव पेस गर्नुभएको छ । आजको बैठकमा मन्त्री लेखकले उक्त विधेयक विचार गरियोस् भनि पेस गर्नुभएको हो ।

सभामुख देवराज घिमिरेले विधेयकमाथिको छलफलमा सैद्दान्तिक पक्षमा मात्र छलफल हुने जानकारी दिनुभएको छ ।

यस्तै नेकपा एमालेका सांसद रघुजी पन्तले सशस्त्र प्रहरी बल नेपालको नामका बारेमा सोच्न सकिने बताउनुभएको छ । प्रतिनिधिसभा बैठकमा पेस भएको सशस्त्र प्रहरी बल नेपाल २०८१ विधेयकमाथिको छलफलमा भाग लिँदै उहाँले सीमा सुरक्षा बल वा विपत् नियन्त्रण बल भनेर नाम राख्न सकिने बताउनुभयो ।

उहाँले सशस्त्रलाई तीन वटा काममा लगाउन सकिने भन्दै सीमा सुरक्षा, विपत् व्यवस्थापन र दङ्गा नियन्त्रणमा खटाउनुपर्ने बताउनुभयो । सशस्त्र र नेपाल प्रहरीको कार्यक्षेत्रमा भएको दोहोरोपन सच्चाउनुपर्ने र फोर्स निर्माण गरिसकेपछि सेवा सुविधा पनि दिनुपर्ने बताउँदै पन्तले कार्यक्षेत्र टुङ्ग्याएर त्यही आधारमा कानुन बनाउन र सुविधा दिन सकिने बताउनुभयो ।