काठमाडौं । राष्ट्रिय सभा सदस्य बामदेव गौतमले पुनः राजा बन्ने चाहना परित्याग गरेर प्रजातान्त्रिक राजनीतिक गरी प्रधानमन्त्री बन्न पूर्वराजा ज्ञानेन्द्र शाहलाई सुझाव दिनुभएको छ ।

राष्ट्रिय सभाको आजको बैठकमा बोल्दै उहाँले ‘राजनीतिक पार्टीका नेताहरूले देशको विकास, उन्नति, प्रगति गरेनन्, त्यसैले मलाई राजा बनाउ’ भन्नु उचित नहुने बताउनुभएको हो ।

उहाँले पुनः राजा बन्ने चाहना परित्याग गरेर राजनीतिक पार्टी खोलेर निर्वाचन आयोगमा दर्ता गराइ २०८४ मा हुने निर्वाचनमा भाग लिन र जनताद्धारा निर्वाचित भएर आउन सुझाव दिनुभएको छ ।

साथै उहाँले चुनावमा निर्वाचित भएर संसदबाट प्रधानमन्त्री बन्न र नेपालको चौतर्फी विकास तथा समृद्धि कायम गरी देखाइ दिन चुनौती समेत दिनुभएको छ । राजा महेन्द्रलाई चितवनको दियालो बंगलामा हत्या गर्ने पनि राज परिवारकै व्यक्ति भएको दाबी गर्दै गौतमले वीरेन्द्रको राजसहित उनको वंश विनाश गर्ने पनि राजपरिवारकै सदस्यहरू भएको बताउनुभयो ।