काठमाडौं । ऊर्जा, जलस्रोत तथा सिँचाइमन्त्री दीपक खड्काले जलविद्युत आयोजनालाई एकै पटक सुरु गर्न आवश्यक रहेको बताउनु भएको छ । शुक्रवार पूर्वाधार विकास समितिको बैठकमा बोल्दै मन्त्री खड्काले जलविद्युत् क्षेत्रमा सरकारले लिएको लक्ष्य हासिल गर्न सबै आयोजनाहरू एकैसाथ सुरु गर्नुपर्ने बताउनुभएको हो ।
विभिन्न कारणले जलविद्युत आयोजना निर्माणको काम रोकिएर बस्दा देशलाई नै घाटा भएको उहाँले बताउनुभयो । साथै लगानीकर्ता पर्खिएर बस्नुपर्ने अवस्थाका कारण केही महत्वपूर्ण आयोजना सुरु हुन नसकेको समेत उहाँले बताउनुभयो ।
बैठकमा समितिका सदस्यहरूले सरकारको स्वामित्व रहेको जलविद्युत कम्पनीहरूले पनि समयमा नै आयोजना सम्पन्न गर्न नसक्दा राज्यलाई घाटा भएको प्रति ध्यानाकर्षण गराएका थिए ।