काठमाडौँ । नेपाली नागरिकलाई नक्कली भुटानी शरणार्थी बनाएर अमेरिका लैजाने भन्दै ठगी गरेको आरोपमा पक्राउ परेका प्रतिवादीहरू वेचन झा र निलम्वित सचिव टेकनारायण पाण्डेको मुद्दामाथि सर्वोच्चमा सुनुवाइ हुँदैछ ।

पक्राउपछि जिल्ला अदालत काठमाडौंले दुवै जनालाई थुनामा पठाएको थियो । जिल्ला अदालतले थुनामा पठाएपछि पाण्डे माघ ११ गते र झा माघ २ गते सर्बोच्चमा पुगेका थिए । त्यसअघी पाण्डे जिल्लाको आदेशविरुद्ध उच्च अदालतमा पुगेपनि उच्चले जिल्लाको आदेश नै सदर गरेको थियो । त्यस्तै अर्का प्रतिवादी बेचन झा पूरक अभियोग पत्रवाट यो प्रकरणमा जोडिएका हुन् । झालाई पनि पुर्पक्षका लागि कारागार पठाएपछि उनी उच्च अदालत पाटन पुगेका थिए । उच्च अदालतले पनि जिल्लाको आदेश सदर गरेपछि उनी सर्बोच्च पुगेका हुन् ।

जिल्ला अदालतको आदेशले थुनामा रहेका पाण्डेको मुद्दा न्यायाधीश कुमार चुडालको इजलासमा पेसी रहेको छ, भने झाको मुद्दा प्रधानन्यायाधीश प्रकाशमानसिंह राउत र न्यायाधीश शारंगा सुवेदीको संयुक्त इजलासमा पेसी तोकिएको छ ।