काठमाडौँ । उपप्रधान एवं सहरी विकासमन्त्री प्रकाशमान सिंहले भूकम्पबाट हुने क्षति कम गर्न संरचनाहरू भूकम्प प्रतिरोधी बनाउनु पर्नेमा जोड दिनुभएको छ ।भूकम्पीय जोखिम न्यूनीकरणमा ध्यान दिन नसक्दा भौतिक संरचनाहरू विनाश भएका कारण अथाह जनधनको क्षति हुने गरेको बताउँदै सिंहले भुकम्पले पार्ने क्षती कम गर्न भुकम्प प्रतिरोधि संरचना निर्माण गर्नुपर्ने बताउनुभएको हो ।

पछिल्लो देशमा विभिन्न खालका विपद्जन्य घटनाबाट देशले ठुलो जनधनको क्षती ब्यहोर्न परेको भन्दै सिंहले भूकम्पका कारण हुने जनधनको क्षति कम गर्न राष्ट्रिय भवन संहिता पालना गर्नु अपरिहार्य रहेको बताउनुभयो । विगतका घटनाबाट पाठ सिक्दै अब बन्ने घर संरचनाहरू भूकम्प प्रतिरोधी बनाउनु पर्ने उहाँको भनाई थियो ।

सिंहले प्राकृतिक प्रकोपबाट हुने जोखिमलाई ध्यान दिँदै संवेदनशील भूउपयोगको योजनाको कार्यान्वयनमा सबैको हातेमालो जरुरी रहेको उल्लेख गर्नुभयो । त्यस्तै विपद्का घटनाहरूबाट सुरक्षित हुन आवश्यकता अनुसार पूर्वतयारी तथा खोज उद्धार अवस्थामा सुधार गर्नुपर्ने बताउनु भएको छ ।