काठमाडौं । प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिले नेपालमा सुर्ती गुड्का र सो सम्बन्धी कच्चा पदार्थको विवरण माग गर्ने निर्णय गरेको छ । सिंहदरबारमा बसेको समिति बैठकले नेपालमा आयात हुने सुर्ती गुड्कालगायत कच्चा पदार्थको यकिन विवरण समितिमा पेश गर्न उद्योग मन्त्रालयलाई निर्देशन दिएको हो ।
बैठकले चुरोटमा प्रयोग हुने विभिन्न फ्लेवर, क्याप्सुल जस्ता नशालु पदार्थका कारण स्वास्थ्यमा गम्भीर समस्या हुने भएकाले त्यस्ता पदार्थको आयातका साथै उत्पादन र प्रयोगमा समेत रोक लगाउन मन्त्रालयलाई निर्देशन दिएको छ । यसैगरी समितिले सुर्तीजन्य पदार्थको प्रयोगबाट जनस्वास्थ्यमा पर्ने नकारात्मक प्रभावलाई न्यूनीकरण गर्न स्वास्थ्य मन्त्रालयलाई सुझाव दिने निर्णय गरेको समिति सभापति अब्दुल खानले जानकारी दिनुभयो ।
बैठकमा उद्योग, वाणिज्य तथा आपूर्तिमन्त्री दामोदर भण्डारीले नयाँ सरकार गठन भएसँगै मन्त्रालयले गरेका कामहरूको विवरण समय–समयमा सार्वजनिक गरिने बताउनुभयो । मन्त्रालयभित्र समस्यामा रहेका विषयलाई निर्मम ढंगले छलफल गरेर निष्कर्षमा पुराउने उहाँले प्रतिबद्धता जनाउनुभयो । मन्त्री भण्डारीले उद्योगीहरूको समस्या समाधान गर्न हडतालमुक्त, लोडसेडिङमुक्त बनाउने नीतिका साथ अघि बढ्ने जिकिर गर्नुभयो ।
बैठकमा चिनी उद्योग तथा उखु किसानका समस्या समाधान सुझाव उप समितिको प्रतिवेदन र स्पञ्ज आइरन, विलेट्सको भन्सार महसुल, अन्तःशुल्क तथा उद्योगहरूको अध्ययन अनुगमन उप समितिको प्रारम्भिक प्रतिवेदन पेश गरिएको थियो ।
