काठमाडौं । राष्ट्रिय सभाको बैठक पनि आज बस्दैछ । जसअनुसार राष्ट्रियसभाको बैठक दिउँसो सवा १ बजे बस्ने कार्यसूची रहेको छ ।

राष्ट्रियसभाको बैठकमा पनि आगामी आर्थिक वर्ष २०८१/०८२ का लागि सरकारद्वारा संसदमा प्रस्तुत बजेटमाथि आजबाट छलफल हुने भएको छ । अर्थमन्त्री वर्षमान पुनले आजको बैठकमा बजेटमाथि छलफल गरियोस् भन्ने प्रस्ताव राख्नुहुने कार्यसूची रहेको संसद् सचिवालयले जनाएको छ ।

संघीय सरकारले आगामी आर्थिक वर्ष २०८१/०८२ का लागि १८ खर्ब ६० अर्ब ३० करोड रुपैयाँ बराबरको वार्षिक आयव्ययको विवरण बजेट ल्याएको थियो ।

जेठ १५ गते संसद्को संयुक्त बैठकमा आगामी आर्थिक वर्षको बजेट प्रस्तुत गर्दै अर्थमन्त्री वर्षमान पुनले प्रस्तुत बजेटका लागि चालुतर्फ ११ खर्ब ४० अर्ब ६६ करोड, पुँजीगततर्फ ३ खर्ब ५२ अर्ब ३५ करोड र वित्तीय व्यवस्थापनतर्फ ३ खर्ब ६७ अर्ब १८ करोड रकम विनियोजन गरेको बताउनु भएको थियो ।