काठमाडौं । आजियाटाले एनसेलमा आफ्नो स्वामित्व रहेको ८० प्रतिशत सेयर बिक्री गर्दा अरापदर्शी कारोबार गरेको छ । नेपालको नियामक निकाय दूरसञ्चार प्राधिकरणलाई थाहा नदिई कर छल्ने ध्येयले न्यून मूल्यमा सेयर बिक्री गरेको खुलेको छ ।

सन् २०१६ को एनसेल किनबेचमा पुँजीगत लाभकर छल गर्ने प्रयास भएकोमा अहिले पनि अपारदर्शी ढंगले सेयर किनबेच गरेर राजस्व छल्न खोजेको सरोकारवालाले आरोप लगाएका छन् । क्रान्तिकारी कम्युनिष्ट पार्टी नेपालका प्रवक्ता धर्मेन्द्र बास्तोलाले एनसेल कहिल्यै पनि विवादरहित नरहेको स्मरण गर्दै तत्कालीन समयमा यसको टावर हान्ने र सीम बहिष्कार गर्ने कार्य आफूहरुले गरेको बताउनुभयो ।

विदेशी लगानीकर्ता आजियाटाले आफ्नो सेयर ६ अर्ब ६५ करोड रूपैयाँमा बिक्री गरेको छ । आजियाटा समूहको स्वामित्व रहेको रेनोल्ड्स होल्डिङ लिमिटेडलाई स्पेक्ट्रलाइट युके लिमिटेडले खरिद गरेको हो । एनसेल किन्दा र बिक्री हुँदा समेत सरकारको प्रतिक्रिया आएको छैन । सार्वजनिक लेखा समितिका सभापति ऋषिकेश पोखरेलले चारवर्ष पछि एनसेल नेपालको हुने भएकोले यो बेला सरकारकै मान्छेहरुको मिलेमतोमा गलत कार्य भएको हुनसक्ने आशंका गर्नुभयो ।

अर्थ समितिका सभापति सन्तोष चालिसेले लामो समयदेखि एनसेलमा मुद्धामामिला परिरहेको बताउँदै यसबारे थप बुझ्नका लागि बुधबार बैठक आह्वान गरेको बताउनुभयो । बैठकमा विज्ञहरुको सुझावका आधारमा निर्णय लिइने उहाँले बताउनुभयो ।

नेपाल दूरसञ्चार प्राधिकरणका उपनिर्देशक सुन्दर प्याकुरेलले आफूहरुलाई जानकारी नै नदिइ बिक्री भएको सूचना आएको बताउँदै यो पारित नहुने स्पष्ट पार्नुभयो । करछलीका लागि यस्तो क्रियाकलाप गरेको हुनसक्ने बताउँदै उहाँले पत्र समेत काटिसकेको बताउनुभयो ।

आजियाटाले घुमाउरो शैलीमा नेपाल सरकारलाई प्राप्त हुने करमा हानि पु¥याउने नियत देखिएको छ । आजियाटाले अस्वाभाविक मूल्य र ग्रान्ड डिजाइनअनुसार नै सेयर बिक्री गरेको पाइएको छ । एक वर्षकै करिब ६ अर्ब ६१ करोड नाफा गरिरहेको संस्थाले ५ करोड अमेरिकी डलरमा सेयर बिक्री गर्नुमा कुनै न कुनै भित्री स्वार्थ पक्कै देखिन्छ ।