काठमाडौं । नेपाली कांग्रेसका नेता एवं सांसद प्रदीप पौडेलले जाजरकोटका भूकम्पपीडितको राहतमा प्रभावकारिता बढाउन सरकारलाई सुझाव दिनुभएको छ ।
नेपाली रेडियो नेटवर्कको कार्यक्रम नेपाली बहसमा पत्रकार ऋषि धमलासँग संवाद गर्दै नेता पौडेलले भूकम्पपीडितको राहतमा सरकारले एकद्वार प्रणाली बनाए पनि त्यसलाई व्यवस्थित र प्रभावकारी बनाउन नसकेको बताउनुभयो ।
पीडितको आवश्यकता र प्राथमिकता निर्धारण गरेर तत्काल सहयोग गर्न सक्नुपर्ने उहाँको भनाई छ। तत्काल न्यानो कपडा, टेन्ट, पाल, खाद्य सामग्री, औषधि लिएर जानु जरुरी रहेको बताउँदै उहाँले संकलित राहत र सहयोग तीनचार महिना पछि गएर केही अर्थ नहुने उहाँले दाबी गर्नुभयो ।
भूकम्पपीडितलाई कतिपयले देखावटी सहयोग मात्र गरेको आरोप पौडेलले लगाउनुभयो । राहतमा विभेद र राजनीतीकरण भए सरकारको आलोचना बढ्ने पनि उहाँले औंल्याउनुभयो ।
सरकारले ५० हजार दिए पनि तत्काल भूकम्प प्रभावित क्षेत्रमा सिकर्मी र मिस्त्रीको अभाव हुने पनि पौडेलले बताउनुभयो । साथै उहाँले कांग्रेसले १ हजार टहरा बनाउने कुरा घोषणामा मात्र सीमित हुनु नहुने पनि औंल्याउनुभयो ।
अर्को प्रसंग नेता पौडेलले भूकम्पबाट देश पीडित भएको र चाडबाडका बेला सरकार परिवर्तनको कुरा उपयुक्त नहुने बताउनुभयो ।
