काठमाडौं । नेपाली कांग्रेसका नेता रामहरि खतिवडाले आज बस्ने केन्द्रीय समितिको बैठकबाट पार्टी बलियो र दह्रो हुने विश्वास व्यक्त गर्नुभएको छ ।

नेपाली रेडियो नेटर्वको नेपाली बहसमा पत्रकार ऋषि धमलासँग कुरा गर्दै राज्य व्यवस्था समितिका सभापति रहनुभएका खतिवडाले देउवा र कोइराला दुवै नेताको चाहना पार्टी कमजोर होस् भन्ने नभएकाले पार्टीलाई बलियो र दह्रो बनाउने नै इच्छा रहेको स्पष्ट पार्नुभयो ।

कोइरालाका केही कुरा सभापति देउवाले सम्बोधन गर्नुपर्नेमा पनि जोड दिनुभएको छ । दुवै नेताको चिन्ता पार्टीलाई अघि बढाउने नै भएको दाबी गर्दै उहाँले देउवाको यो अन्तिम कार्यकाल रहेकाले कोइरालाका केही कुरा सम्बोधन गरेरै जाने बताउनुभयो । दुई नेताको बीचमा भएका केही दूरी आजको बैठकबाट घट्ने पनि उहाँको विशवास छ ।

कांग्रेसको केन्द्रीय समिति बैठक आज बस्दैछ । पार्टी कार्यालय सानेपामा आज दिउँसो १ बजे बैठक बस्न लागेको हो ।
बैठकमा समसामयिक राजनीति, आन्तरिक पार्टी संरचनालगायत विषयमा छलफल हुने छ ।

यस्तै, अर्को प्रसंगमा उहाँले शिक्षकहरुको समस्या समाधानका लागि वार्ताको विकल्प नभएको पनि बताउनुभएको छ ।