काठमाडौं । प्रधानमन्त्री पुष्पकमल दाहाल प्रचण्डको अमेरिकामा भोलि हुने आसन्न भ्रमणको पूर्वसन्ध्यामा द्विअर्थी विषय बाहिर आएका छन् । भदौ १९ गतेदेखि सुरू भएको संयुक्त राष्ट्रसंघको महासभामा सहभागी हुन प्रधानमन्त्री प्रचण्ड भोलि शनिबार संयुक्त राज्य अमेरिका जाँदै हुनुहुन्छ । छिमेकी मुलुक चीनको भ्रमण अगावै अमेरिका जानु र उतैबाट चीन जानुले अन्तर्राष्ट्रिय रुपमा यसको सकारात्मक प्रभाव नपर्ने एकथरीको भनाइ छ । एमालेका नेता डा. भीम रावलले नेपालले हरेक मुलुकलाई दिने सम्मान बराबर हुनुपर्ने बताउनुभयो । चीन छिमेकी मुलुक भएकोले उसलाई दिने सम्मानमा कुनै असर पर्न नहुने उहाँको धारणा छ ।
महासभाको ७८ औं सभालाई प्रधानमन्त्री प्रचण्डले असोज ४ गते नेपालका तर्फबाट सम्बोधन गर्ने कार्यतालिका रहेको छ । लामो समयपछि अमेरिकामा हुन लागेको भ्रमण र त्यसबाट नेपालले लिनुपर्ने फाइदाका विषयमा प्रधानमन्त्री चनाखो हुनुपर्ने सांसदहरूको सुझाव छ । एमसीसी कार्यान्वयनको चरणमा आइसकेकोले अमेरिकासँग नेपालको उपस्थिति कस्तो रहने भन्ने विषयमा भ्रमण टोली संयमित बन्न जरुरी रहेको छ । कांग्रेसका वरिष्ठ नेता गोपालमान श्रेष्ठले मुलुकलाई हित हुने पक्षमा मात्रै प्रधानमन्त्रीको उपस्थिति रहनुपर्ने बताउनुभयो । श्रेष्ठले चीन भ्रमणमा रहँदा चुच्चे नक्साको विषयमा कुरा उठाउन प्रधानमन्त्रीलाई आग्रह गर्नुभयो ।
प्रधानमन्त्री प्रचण्डले आजको संसद् बैठकमा आफ्नो औपचारिक भ्रमणका विषयमा जानकारी दिनुभएको थियो । उहाँले प्रधानमन्त्रीको हैसियतले हुने भ्रमणको निरन्तरता रहेको पनि प्रष्ट पार्नुभएको छ । संयुक्त राष्ट्रसंघमा गर्ने सम्बोधन र चीन भ्रमणको तालिकाबीच अत्यन्त छोटो समय रहेका कारण न्यूयोर्कबाट छिमेकी राष्ट्र चीनको भ्रमणमा जानुपर्ने परिस्थिति बनेको उहाँको भनाइ छ ।
न्युयोर्कमा रहँदा प्रधानमन्त्री प्रचण्ड दीगो विकास लक्ष्य सम्मेलन, क्लाइमेट एम्बिसन समिटलगायत अन्य महत्त्वपूर्ण एजेन्डासहितका उच्चस्तरीय कार्यक्रममा सहभागी हुने तय भएको छ । अमेरिकी राष्ट्रपति जो बाइडेनले महासभामा सहभागी हुन आएका विभिन्न देशका राष्ट्र तथा सरकार प्रमुखको सम्मान दिने रात्रीभोजमा पनि प्रधानमन्त्री प्रचण्ड सहभागी हुनुहुनेछ । महासभा चलिरहँदा प्रधानमन्त्री प्रचण्डले विभिन्न देशका समकक्षी तथा प्रतिनिधि मण्डलसँग साइडलाइन भेटवार्ता गर्ने कार्यतालिका रहेको छ ।
