काठमाडौं । चीनका लागि नेपाली राजदूत महेन्द्रबहादुर पाण्डेले नेपाल–भारत सीमा विवादजस्ता विषयबारे चिनियाँ सरकारी मुखपत्रलाई दिएको अन्तर्वार्ता दिनुभएको छ ।

ग्लोबल टाइम्सलाई दिएको अन्तर्वार्तामा पाण्डेले भारतीय सञ्चारमाध्यमले नकारात्मक खबर प्रकाशित गरे पनि नेपाल र चीन सम्बन्ध सौहार्दपूर्ण रहेको बताउनुभएको थियो ।

तर, पूर्वपरराष्ट्रमन्त्रीसमेत रहेका पाण्डेको अभिव्यक्ति कूटनीतिक अभ्यासविपरीत भएको भन्दै परराष्ट्रविद्लगायत राजनीतिज्ञहरुले पनि त्यसबारे सरकारले स्पष्टीकरण दिनुपर्ने बताएका छन् ।

अन्तर्वार्तामा व्यक्त उनका कतिपय अभिव्यक्तिले भारतीय सञ्चारमाध्यम र भारत सरकारको दृष्टिकोण एउटै रहेको जस्तो आशय लाग्ने भन्दै विज्ञहरूले एक राजदूतले त्यस किसिमको धारणा राख्नु गलत भएको बताएका छन् ।

हालै नेपाल–चीन सीमा क्षेत्रमा पर्ने हुम्लाको नाम्खा गाउँपालिकाको भूमिमा चिनियाँ पक्षले भवनहरू बनाएको विवरण आएकै बेला राजदूत पाण्डेको यो अन्तर्वार्ता प्रकाशित भएको छ ।

ती भवनहरू नेपाली भूमिमा बनेको खबर निरन्तर रूपमा भारतीय सञ्चारमाध्यमले सम्प्रेषण गरेका थिए । त्यसप्रति चासो व्यक्त गर्दै गएको मङ्गलवार चिनियाँ दूतावासले ती भवनहरू आफ्नो भूमिमा बनेको बताएको थियो ।

भवन बनेको क्षेत्रमा नेपाली टोली स्थलगत अध्ययनमा गएको भए पनि त्यसको प्रतिवेदन नआउँदै बुधवार नेपालको परराष्ट्र मन्त्रालयले भवन चिनियाँ भूभागमा बनेको र त्यहाँबाट एक किलोमिटरवरै नेपाल–चीन सीमा रहेको उल्लेख गरेको थियो ।

हुम्लानजिकै चिनियाँ भूमिमा नै आफूले भवन बनाएको चिनियाँ पक्षको स्पष्टोक्ति छ ।

पछिल्ला दिनमा नेपाल–भारत सम्बन्ध अलि धमिलिएको छ । यस्तो वेला एउटा दलको केन्द्रीय नेता भइसकेको र देशको पराराष्ट्रमन्त्री भइसकेको व्यक्ति राजदूत बनेर हलुका टिप्पणीतिर लाग्नु राम्रो संकेत नभएकोसमेत विज्ञहरुको भनाइ छ ।

‘नकारात्मक टिप्पणीहरु कूटनीतिक सिद्धान्तमा पर्दैनन् । जिम्मेवार पदमा बसेको व्यक्तिले सम्बन्धको संवेदनशीलता ख्याल गरेर बोल्नुपर्छ’, परराष्ट्र मामिलाका अर्का विज्ञ दिनेश भट्टराईले आज ट्विट गर्दै भन्नुभएको छ, ‘उहाँले नबुझेको हो भन्ने मलाई लाग्दैन ।’