काठमाडौं । नेपाली कांग्रेसका प्रचार विभाग प्रमुख मीनबहादुर विश्वकर्माले आफ्नो पार्टी अर्को सत्तागठबन्धन बनाउने चलखेलमा नलागेको बताउनुभएको छ ।

पार्टी सभापति शेरबहादुर देउवा नयाँ गठबन्धन बनाउनका लागि नभइ स्वास्थ्य परीक्षणका लागि सिंगापुर जानुभएको स्पष्ट पार्दै उहाँले यो सरकार नेपाली कांग्रेस आफैंले पहल गरेर बनाएको दाबी गर्नुभयो ।

नेपाली रेडियो नेटवर्कको नेपाली बहसमा पत्रकार ऋषि धमलासँग कुरा गर्दै नेता विश्वकर्माले कांग्रेसका कारण सरकार बदलिने र गठबन्धन टुट्ने कुरा नहुने बताउनुभयो ।

कांग्रेसलाई सरकारको नेतृत्व गर्न हतारो नभएको पनि विश्वकर्माको तर्क छ । आफू समाजवादी मोर्चा पार्टी नै बनोस् भन्ने पक्षमा रहेको बताउँदै उहाँले कम्युनिस्ट पार्टीहरु फुट्ने र जुट्ने अनुमान धेरैपटक फेल खाएको बताउनुभयो ।

मोर्चा बनिसकेपछि बजेट असफल हुने र सरकार ढल्ने सम्भावना प्रचण्डले टारेको नेता विश्वकर्माको दाबी छ ।

अर्को प्रसंगमा नेता विश्वकर्माले बीआरआई सम्झौता नै नभएको पोखरा विमानस्थलबारे भ्रम फैलाइएको आरोप पनि लगाउनुभयो ।