काठमाडौं । तोकिएको समयमा मल नल्याउने दुई ठेकेदार कम्पनीले सरकारविरुद्ध तेस्रो मुद्दा दायर गरेका छन् ।

उच्च अदालतमा ठेक्का सम्झौता रद्द र धरौटी जफत नगर्न भन्दै दायर गरिएको पहिलो दुई उत्प्रेषण निवेदनमा छलफल चलिरहेकै बेला कालोसूची सिफारिसविरुद्ध ठेकेदार कम्पनीले पुनः अर्को मुद्दा दायर गरेको कृषि सामग्री कम्पनी लिमिटेडले जनाएको छ ।

मल नल्याउने ठेकेदारसँगको ठेक्का सम्झौंता तोड्दै भदौ २१ गते कम्पनीले धरौटी जफत गर्ने निर्णय गरेको थियो । सरकारी कम्पनीको निर्णयविरुद्ध उच्च अदालत पाटनमा दुई ठेकेदार कम्पनीले उक्त निर्णय बदर गर्न माग गर्दै २८ भदौमा उत्प्रेषण रिट दायर गरेका थिए ।

मुद्दा दायरको भोलिपल्ट कृषि सामग्री कम्पनी लिमिटेडले शैलुङ र होनीको कम्पनीलाई कालोसूचीमा राख्न सार्वजनिक खरिद अनुगमनको कार्यालयलाई सिफारिस गरेको थियो ।

तर, उच्च अदालत पाटनका न्यायधीश हरिप्रसाद भण्डारीको एकल इजालाशले २१ भदौको निर्णय तत्काल कार्यान्वयन नगर्न अन्तरिमकालीन आदेश जारी गर्दै छलफलका लागि विपक्षीलाई झिकाएको थियो । उक्त आदेश कृषि कम्पनी नपुग्दै दुवै कम्पनीविरुद्ध कृषि कम्पनीले कालोसूची सिफारिसको निर्णय गरेको थियो ।