काठमाडौं । प्रधानमन्त्री पुष्पकमल दाहाल प्रचण्डले शुक्रबार(आज) शपथ लिने मन्त्रीहरूको अधिकांश सूची टुंग्याउनुभएको छ । केही मन्त्रालय र व्यक्तिबारे अझै छलफल रहेकाले अन्तिम रूप दिएर मन्त्रिपरिषद् विस्तार गर्ने प्रचण्डको तयारी छ । प्रचण्डको सचिवालय स्रोतका अनुसार कांग्रेसबाट चार जनाको नाम फाइनल भएको छ । जसमा पूर्णबहादुर खड्का उपप्रधान तथा रक्षा मन्त्री बन्नुहुने भएको छ भने प्रकाशशरण महत अर्थमन्त्री बन्नुहुने भएको छ।
यस्तै रमेश रिजाल उद्योग वाणिज्य तथा आपूर्ति मन्त्री बन्दा सिता गुरुङ शहरी विकास मन्त्री बन्नुहुने भएको छ । यस्तै नेकपा माओवादी केन्द्रबाट नारायणकाजी श्रेष्ठ उपप्रधान तथा गृहमन्त्री बन्नुहुने भएको छ । यस्तै शक्ति बस्नेत ऊर्जा, जलस्रोत तथा सिँचाइ मन्त्री बन्दा रेखा शर्मा सञ्चार तथा सूचना प्रविधि मन्त्री कायम हुनुहुने छ ।
यस्तै सुदन किराँती संस्कृति, पर्यटन तथा नागरिक उड्डयन मन्त्री र अमनलाल मोदी संघीय मामिला तथा सामान्य प्रशासन मन्त्रीमा कायम हुनुहुने छ ।
यस्तै नेकपा एकीकृत समाजवादीबाट बेदुराम भुसाल कृषि तथा पशुपंक्षी विकास र प्रकाश ज्वाला भौतिक पूर्वाधार तथा यातायात मन्त्री बन्नुहुने छ। यस्तै जसपाबाट अशोक राई शिक्षा, विज्ञान तथा प्रविधि मन्त्री बन्दा लोसपाबाट शरद्सिंह भण्डारी श्रम, रोजगार तथा सामाजिक सुरक्षा मन्त्री बन्नुहुने छ ।
यस्तै नाउपाबाट रञ्जिता श्रेष्ठ भूमि व्यवस्था, सहकारी तथा गरिबी निवारण मन्त्री बन्दा नेसपाबाट महिन्द्र राय यादव महिला, बालबालिका तथा ज्येष्ठ नागरिक मन्त्री बन्नुहुने छ । यस्तै अब्दुल खान खानेपानी तथा सरसफाइ मन्त्रीमा कायम हुनुहुने छ। उहाँ जनमतबाट यसअघि नै मन्त्री बन्नुभएको हो ।
