काठमाडौं । मंगलबार(आज) पनि सेयर बजारमा दोहोरो अंकको वृद्धि भएको छ । अघिल्लो साता निरन्तर घटिरहेको सेयर बजारमा पछिल्लो समय लयमा फर्किने संकेत देखिएको छ ।
हिजो १७.७० अंक बढेको परिसूचक नेप्से आज १२.१० अंकले बढ्दै १९१८.१० विन्दुमा पुगेर रोकिएको छ । शून्य दशमलव ६३ प्रतिशतले बजार बढेको हो । आज २५८ वटा धितोपत्रको ३५ हजार ९२६ वटा कारोबारबाट ४० लाख ७७ हजार ७७८ कित्ता सेयर किनबेच हुँदा १ अर्ब ४४ करोड ३७ लाख १३ हजार ८७८ रुपैयाँको कारोबार भएको छ ।
आजको कारोबारमा आएका १४२ कम्पनीको मूल्य बढेको छ भने ६७ कम्पनीको मूल्य घटेको छ र ७ वटा कम्पनीको मूल्यमा भने कुनै परिवर्तन आएको छैन । आज विकास बैंक, वित्त र निर्जीवन बीमा उपसूचक घटे । अन्य उपसूचक भने बढेका छन् । यसमा पनि सबैभन्दा बढी लघुवित्त उपसूचक बढेको छ ।
आज सुपरमाइ हाइड्रो, सृजनशील लघुवित्त, एसियन हाइड्रो, महिला लघुवित्त, नेरुडे लघुवित्तसहितका कम्पनीको मूल्य सबैभन्दा धेरैले बढेको छ । तेह्रथुम पावर, मितेरी विकास बैंक, वेस्ट फाइनान्ससहितका कम्पनीको मूल्य धेरैले घटेको छ । आईएमई जनरल इन्स्योरेन्स, हिमालयन डिष्ट्रिलरी, शिवं सिमेन्ट, एनआईसी एसिया बैंक, अपि पावरसहितका कम्पनीको धेरै कारोबार भएको छ ।
