काठमाडौं । केही दिन अघिबाट लामो समयदेखिको तिक्ततालाई बिर्सेका एमाले अध्यक्ष केपी शर्मा ओली र नेकपा एकीकृत समाजवादीका अध्यक्ष माधवकुमार नेपालबीच पुनः दोहोरी सुरु भएको छ । नेकपा एमालेले राष्ट्रपतिको उम्मेदवारका रुपमा नेपाललाई अघि सारेपनि नेपालले मानेनन् । यो जालझेलनै रहेको दाबी गर्दै नेपाल त्यसबाट ब्याक भएका थिए । यता, ओलीले भने आफूले गरेको प्रस्तावबारे आठ दलको बैठकमा गएर नेपालले राखेको तर कांग्रेसका वरिष्ठ नेता रामचन्द्र पौडेलले राष्ट्रपतिमा आफू रहेको दाबी गरेपछि पछि हटेको जिकिर गर्नुभयो । एमालेले कुनै छलकपट बिना नेपाललाई राष्ट्रपति दिन खोजेको उहाँको दाबी थियो । 

यता, नेपालले कुनै–कुनै दलहरूले हिजोका दिनमा नेकपा एकीकृत समाजवादी पार्टी नै नमानेको भएपनि अहिले आएर हारगुहार मागिरहेको दाबी गर्नुभयो । नेकपा एमालेलाई लक्षित गर्दै उहाँले आफूलाई राष्ट्रपतिका लागि आएको प्रस्ताव तिगडमबाजी मात्रै भएको बताउँदै नेता, कार्यकर्ताहरूलाई झुक्काउने प्रपञ्च मात्रै रहेको स्पष्ट पार्नुभयो । 

नेपालले देशभरका कम्युनिस्ट पार्टीहरूलाई मिलाउन आफूहरूले ८ दलीय गठबन्धनलाई बलियो बनाउने नीति लिएको पनि बताउनुभएको छ । एमालेबाट राष्ट्रपतिको अफर आए पनि राजनीतिक स्थायित्व र मित्र शक्तिहरूलाई धोका नदिनका लागि सो प्रस्ताव अस्वीकार गरेको उहाँको दाबी छ । नेपालले आफूले नेकपा एमाले, माओवादी र नेकपा एसलाई एकताबद्ध बनाउन विगतको नेकपा ब्युँताउने प्रस्ताव राखेको समेत बताउनुभयो ।

यता, नेकपा एकीकृत समाजवादीका नेता कार्यकर्ताहरूमा भने एमालेसँग मिल्नुको विकल्प नरहेको भान जागृत भएको छ । सकेसम्म ओली–नेपाल सच्चिएर एकढिक्का हुँदै अगाडि बढ्नुपर्ने नेताहरूको सुझाव छ । नेकपा एसका पोलिटब्यूरो सदस्य सोमप्रसाद पाण्डे पनि स्पष्ट नियतका साथ एकीकृत हुनुपर्ने पक्षमा जोड दिँदै आउनुभएको छ । 

मुलुकका दलहरूबीच बढेको अधैर्यता, अहंकार, स्वार्थीपनले विकास र समृद्धिलाई ओझेलमा पारेको छ । अर्थतन्त्र जर्जर बनेको बेलामा छिमेकीलगायतका देशहरूले थप फाइदा लुट्दै विभाजित बनाउने तर्फ क्रियाकलाप गरेको देखिन्छ । असंलग्न परराष्ट्र नीतिलाई अङ्गीकार गर्न नसक्दा, राष्ट्रिय मुद्दामा एकजुट हुन नसक्दा र आफू अनुकूल धारणा बनाउँदा बाह्य हस्तक्षेप बढ्दै गएको छ भने यो भूमिमा गलत अभ्यास पनि सुरु भएको छ ।