काठमाडौं। नेकपा एमालेका अध्यक्ष केपी शर्मा ओलीले राष्ट्रपति पद कसले पाउने भन्ने पहिले नै तय भएको विषय बताउँदै आफ्नो पार्टीले उठाउने उम्मेदवारलाई नेकपा माओवादी केन्द्रले समेत समर्थन गर्ने दाबी गर्नुभएको छ ।

विराटनगरमा आज सञ्चारकर्मीहरूसँग कुराकानी गर्दै अध्यक्ष ओलीले आगामी फागुन १३ गते राष्ट्रपतिको उम्मेदवार टुङ्गो लाग्ने पनि बताउनुभएको हो ।

अध्यक्ष ओलीले भन्नुुभयो, ‘राष्ट्रपति को हुन्छ पहिले नै तय भएको छ । अहिलेको समीकरण जन्मँदा त्यसको जन्मकुण्डलीमा नै लेखेर आएको छ । यसमा माओवादीले साथ नदिने सम्भावना छैन । त्यसको परिकल्पना पनि नगर्नुहोला ।’

अहिले राष्ट्रपति पदका लागि अष्टलक्ष्मी शाक्य, सुवास नेम्वाङ, ईश्वर पोखरेललगायत विभिन्न नामहरूमाथि भइरहेको चर्चा बारे उहाँले भन्नुभयो, ‘हामीले जो उम्मेदवार बनाउँछौँ तिनी नै राष्ट्रपति बन्छन् । त्यो १३ गते थाहा पाउनुहुन्छ । १३ गते नै म नाम लिन्छु ।’

उहाँले माओवादीको साथ छाडेर नेपाली कांग्रेससँग गठबन्धन गर्ने विषय प्रोभोकिङ कुरा भएको बताउनुभयो ।

पूर्व राजा ज्ञानेन्द्र शाहले दलहरूसँग सहकार्य गर्न गरेको प्रस्तावबारे अध्यक्ष ओलीले भन्नुभयो, ‘ज्ञानेन्द्रजी आफै अलमलमा हुनुहुन्छ । अझै पनि पुरानो झल्को आइरहन्छ । त्यो झल्कोले दुई-चराजना मान्छे वरिपरि देख्यो भने अलिअलि जोस्याउँछ । त्यति मात्र हो अरू केही होइन ।