काठमाडौं । बहराइनका राजकुमार नासिर बिन हामिद अल खलिफासहितको टोली नेपालका दुई हिमाल आरोहणको सिलसिलामा नेपाल आइपुगेको छ । त्रिभुवन विमानस्थल कार्यालयका अनुसार उनीहरु आज दिँउसो काठमाडौं आइपुगेका हुन् ।

उनीहरुलाई शेख इशा एयरवेजबाट विशेष विमानले काठमाडौं विमानस्थलमा ल्याएको हो । बहराइनबाट काठमाडौंका लागि उड्नुअघि उनीहरुलाई बहराइनस्थित नेपाली दूतावासले बिदाइ गरेको थियो ।

बहराइनको रोयल गार्डमा कार्यरत १५ जना बहराइनी नागरिक र ३ जना बेलायती यो टोलीमा सहभागी छन् । जहाज बहराइनबाट राती साँढे १२ बजे स्थानीय समयअनुसार काठमाडौंका लागि उडेको थियो ।

दूतावासका अनुसार टोली नेपालमा दुई महिना बस्ने छ । त्यसक्रममा लोबुचे र मनास्लु हिमाल आरोहण गर्नेछ । यस आरोहणलाई टोलीले आगामि वसन्त ऋतुमा गर्न लागिएको सगरमाथा आरोहणको पूर्वतयारीका रुपमा हेरेको बताइएको छ ।