काठमाडौं । नेपालमा पछिल्लो समय कोरोना भाइरस कोभिड–१९ का संक्रमितको संख्या घट्दो अवस्थामा रहेको छ । देशभर फाट्टफुट्ट मात्र कोरोनाको संक्रमण पुष्टि हुने गरेको छ ।
स्वास्थ्य तथा जनसङ्ख्या मन्त्रालयका अनुसार पछिल्लो २४ घण्टामा कसैमा पनि कोभिडको सङ्क्रमण पुष्टि भएन । ३३३ जनाको नमुना परीक्षण गर्दा सङ्क्रमण पुष्टि नभएको मन्त्रालयको भनाई छ ।
यो अवधिमा देशभर कोरोनाका कारण मृत्यु पनि कसैको भएको छैन । हालसम्म नेपालमा कोरोनाका कारण १२ हजार २० जनाको मृत्यु भएको छ । पछिल्लो २४ घण्टामा देशभर तिन जना निको भएका छन् । योसँगै नेपालमा कोरोनामुक्त हुनेको संख्या नौ लाख ८९ हजार ५७ पुगेको छ ।
हाल देशभर कोरोनाका सक्रिय संक्रमितको संख्या १५ रहेको मन्त्रालयले जनाएको छ ।
नेपालमा हालसम्म पीसीआर विधिबाट १० लाख १ हजार ९२ तथा एन्टीजेन विधिबाट १ लाख ५२ हजार २२० जनामा सङ्क्रमण पुष्टि भएको छ भने ९ लाख ८९ हजार ५७ जना संक्रमणमुक्त भएका छन् । नेपाल कोरोना संक्रमितको निको हुने दर ९८.८ प्रतिशत रहेको छ ।
