काठमाडौं । छोराका हत्यारालाई कारबाहीको माग राख्दै लामो समयदेखि अनशनरत गंगामाया अधिकारीलाई सरकारले राष्ट्रिय ट्रमा सेन्टरमा सारेको छ ।

यसअघि, गंगामालाई कोरोना भाइरसका बिरामी राखिने वीर अस्पतालमा राखिएको थियो । यसको सर्वत्र विरोध भएपछि सरकार अन्यत्र सार्न बाध्य भएको हो ।

आफ्नो ज्यान जोखिममा पारेको भन्दै गंगामाया वीर अस्पतालबाट माइतिघर मण्डलातिर जान खोज्नुभएको थियो तर अस्पतालको गेटमा उहाँलाई रोकिएको थियो ।

घटनापछि मानवअधिकारकर्मी चरण प्रसाईँले गंगामायाको न्यायको लागि सहयोग गरिदिन अनुरोध गर्नुभएको थियो ।

त्यस्तै, कांग्रेस प्रवक्ता विश्वप्रकाश शर्माले पनि आज ट्विटरमार्फत सरकारसँग अनशनरत गंगामायाको तत्काल उचित व्यवस्थापन गर्न माग गर्नुभएको थियो ।

वीर अस्पताललाई कोभिड अस्पताल बनाएपछि वैकल्पिक व्यवस्था गर्ने वा त्यहाँबाट निक्लन दिने राज्यको कर्तव्य भएको स्मरण गराउँदै उहाँले गंगामायाको व्यवस्थापन नगर्ने र निक्लन पनि नदिने कार्य आपत्तिजनक भएको उल्लेख गर्नुभएको छ ।