काठमाडौं । सत्तारुढ गठबन्धनविरुद्ध एक्लै प्रतिस्पर्धा गर्ने बताइरहेको नेकपा एमालेले गठबन्धन बनाएर जाने गरी अगाडि बढेको छ । कांग्रेस–माओवादीसहित पाँच दलीय गठबन्धनलाई अप्राकृतिक गठबन्धन भन्दै आएको नेकपा एमाले जनता समाजवादी पाटी जसपासँग सहकार्य गर्ने निष्कर्षमा पुगेको हो । उम्मेदवारी मनोनयन दर्ताका लागि २ दिन बाँकी रहँदा एमाले सत्तारुढ जसपासँग सिट बाँडफाँडमा सहमति नजिक पुग्न लागेको छ ।
सत्ता गठबन्धनबाट जसपा अलग भएको छ भने लोकतान्त्रिक समाजवादी पार्टी लोसपा नजिक भएको छ । जसपाले सत्ता गठबन्धनसँग दाबी गरेको कम्तीमा २० सिट नपाएपछि बार्गेनिङ गरेको हो ।
पाँच दलीय गठबन्धनमा आबद्ध जसपाका अध्यक्ष उपेन्द्र यादवको टोलीसँग एमाले अध्यक्ष केपी शर्मा ओली सहितका नेताहरूले गरेको वार्ता ‘निर्णायक अवस्था’मा पुगेको र आजै रातिसम्म सम्झौतामा हस्ताक्षर गर्ने तयारी भइरहेको एमाले नेता महेश बस्नेतको दाबी छ ।
सत्ता गठबन्धनमा मागेअनुसार सिट नपाएपछि भड्किएको जसपालाई एमालेले आकर्षक प्रस्ताव गरेको छ । प्रतिनिधिसभातर्फ २५ र त्यही अनुपातमा प्रदेशमा जसपालाई सिट छोड्न एमाले तयार भएपछि सहमतिको वातावरण बनेको हो ।
जसपा एमालेतिर नजिकिएपछि आज सत्तारुढ गठबन्धन र लोकतान्त्रिक समाजवादी पार्टी लोसपाबिचको वार्ता सकारात्मक दिशातर्फ अघि बढेको छ । चुनावी गठबन्धनका लागि छलफल गर्न आज लोसपा नेपालका नेताहरू प्रधानमन्त्री निवास बालुवाटार पुगेका थिए । छलफलमा उनीहरूले संघमा १५ सिट र प्रदेशमा मुख्यमन्त्री मागेको बताइएको छ ।
लोसपाले अहिले पनि एमाले र गठबन्धन दुवैतिर बार्गेनिङ गरिरहेको छ । आज बिहान लोसपा नेता लक्ष्मणलाल कर्णले आफूहरू एमाले सँगै सहमति गरेर अगाडि बढ्ने बताइरहनु भएको थियो । जसपा एमालेतिर नजिकिएपनि लोसपालाई रिस नभएको उहाँको भनाई छ ।
सत्तारुढ गठबन्धनको प्रमुख घटक जसपा एमालेसँग सिट बाँडफाँटका लागि अन्तिम तयारी गरिरहेका वेला लोसपा बालुवाटार पुग्नुले राजनीतिमा नयाँ सहमतिको प्रयासको रुपमा बुझिएको छ । नेपाली कांग्रेसका नेता गोविन्दराज पोखरेलले राजनीतिमा कुन दलले कुन सिट जित्ने भन्ने आधारमा जुन दल जता पनि जान सक्ने सम्भावना अन्तिमसम्म रहने बताउनुहुन्छ ।
सिट बाँडफाँटका लागि एक दल अर्को सँग नजिकिरहेको अवस्थामा यतिबेला राजनीतिक सिद्धान्त भन्दा पनि चुनाव जित्ने रणनीतिमा जो जहाँ पनि मिल्न सक्ने गरी अगाडि बढेको देखिएको छ ।
