काठमाडौं । काठमाडौं महानगरपालिकाका मेयर बालेन्द्र साह (बालेन)ले पुर्वप्रधानमन्त्री डा.बाबुराम भट्टराईसँग भेट गर्नुभएको छ ।
भट्टराई निवासमा पुग्नुभएका बालेनले काठमाडौंको सहरी विकास र सभ्यताको विषयमा छलफल गरेको उहाँको सचिवालयले जानकारी दिएको छ ।
छलफलमा महानगरका ढलहरू ४० वर्ष पुरानो भएकोले फेर्नुपर्ने मेयर बालेनले बताउनुभएको थियो ।
उहाँले काठमाडौंमा सार्वजनिक सवारीलाई व्यवस्थित बनाउनको लागि एकीकृत ढंगले प्राधिकरण गठन गरेर एकद्वारा प्रणालीबाट सञ्चालन गर्ने योजना सुनाउनुभएको थियो ।
काठमाडौंको सभ्यता र विकाससँग सँगै कसरी लैजाने भन्नेबारे बाबुराम भट्टराईको रायसमेत बालेनले माग्नुभएको थियो ।
भट्टराई काठमाडौं देशकै राजधानीमा युवा पुस्ताले गरेको विद्रोह सकारात्मक भएको भन्दै राजनीतिमा पढेलेखेका युवाहरू आउँदा खुसी लागेको प्रतिक्रिया दिनुभएको थियो ।
भेटघाटपछि भट्टराईले सामाजिक सञ्जाल टुईटरमा लेख्नुभएको छ । ‘काठमाडौं मनपा मेयर बालेन शाह र टिमसंग महानगरपालिकाका समस्या र योजनाबद्ध विकासवारे सार्थक विमर्श, सफलताको हार्दिक शुभकामना ।’
बाबुरामसँगै उहाँकी पत्नी हिसिला यमी, छोरी मानुषी यमी भट्टराई पनि छलफलमा थिए ।
