काठमाडौं । सरकारले नीतिगत स्थिरता कायम गर्ने र विगतका प्रतिवद्धता तथा सम्झौताहरू कार्यान्वयन गरे पुँजीबजारमा धेरै सुधार हुने लगानीकर्ताहरूले बताएका छन् ।

विगतमा पनि पटक पटक सहमति र सम्झौता भएको र त्यसको कार्यान्वयन नभएकोले पुँजीबजारका लगानीकर्ताहरु पटक पटक आन्दोलनमा उत्रिनु परेको नेपाल उद्योग वाणिज्य महासंघ अन्तर्गतको पुँजीबजार फोरमका अध्यक्ष अम्बिकाप्रसाद पौडेलको भनाई छ ।

नेपाली रेडियो नेटवर्कको नेपाली बहसमा पत्रकार ऋषि धमलासँगको कुराकानीका क्रममा उहाँले पुराना सम्झौता र प्रतिबद्धता कार्यान्वयन गर्नुको सट्टा सरकारी निकायले नयाँ समस्या सृजना गरेको आरोप पनि लगाउनु भयो ।

सरकारी अधिकारीहरुले गलत नीति लिने, गलत निणर्यहरु गर्ने, गैरजिम्मेबार अभिव्यक्ति दिने गरेकाले पनि पूँजीबजारमा नकारात्मक असर परेको उहाँले बताउनुभयो ।

सरकारी अधिकारीहरुले पुँजीबजार क्षेत्र पनि ठूलो र महत्वपूर्ण आर्थिक क्षेत्र हो भन्ने स्विकार्न वा बुझ्न नसकेकाले पनि समस्या आएको अध्यक्ष पौडेलको भनाई छ ।

पुँजीबजारमा परेको नकारात्मक असरले ठूला लगानीकर्तालाई मात्रै नभई लाखौँ साना लगानीकर्ता र सरकारलाई समेत ठूलो घाटा भइरहेको उहाँले जानकारी दिनुभयो ।

“देशभरी अहिले पुँजीबजारका २५ लाख लगानीकर्ता छन्, सरकारी निकायको सानो गलत भूमिकाबाट ती सबै लगानीकर्तालाई नकारात्मक असर परेको छ,” उहाँले भन्नुभयो ।

इन्भेष्टर्स फोरमका निर्वमान अध्यक्ष समेत रहनु भएका पौडेलले पछिल्लो आठ महिनामा पूँजीबजारमा करिव १५ खर्बभन्दा बढी घाटा भएको र त्यहीबेला सरकारलाई पनि अरबौँ घाटा भएको जानकारी दिनुभयो ।

पुँजीबजारको सुधार र व्यवस्थापनका लागि तत्काल गर्नुपर्ने र दीर्घकालीन रुपमा गर्नुपर्ने कामका बारेमा सम्बन्धित सबै सरकारी निकायहरूलाई पटक पटक घच्घच्याउदा पनि सुनुवाइ नभएपछि आफूहरू अहिले सडक आन्दोलनमा उत्रिनु परेको उहाँले स्पष्ट पार्नुभयो ।

पुँजीबजारका लगानीकर्ताहरूले हिजो काठमाडौँको माइतीघरमा वृहत प्रदर्शन गरेका थिए ।