काठमाडौं । प्रधानमन्त्री शेरबहादुर देउवा अमेरिका भ्रमणमा जाने तयारी तिब्र पारिएको छ । अमेरिकी राष्ट्रपति जो बाइडेनको निमन्त्रणामा देउवा भ्रमणमा जान लाग्नुभएको हो ।
अहिलेसम्म औपचारिक निर्णय भइनसकेको भए पनि यही जेठ २८ गतेदेखि भ्रमण हुने तयारी छ । दुवै तर्फबाट भ्रमणका एजेन्डाका विषयमा काम भइरहेको छ ।
बालुवाटार स्रोतका अनुसार प्रधानमन्त्रीको भ्रमण तयारी भइरहेको तर मिति भने निश्चित नभइसकेको छैन । परराष्ट्र मन्त्रालयमा पनि भ्रमणका एजेन्डाका विषयमा तयारी भइरहेको छ ।
प्रधानमन्त्रीकै रूपमा देउवाले ०५९ वैशाख २३-२८ मा अमेरिकाको औपचारिक भ्रमण गरेका थिए । त्यसयता नेपालबाट उच्चस्तरको अमेरिका भ्रमण भएको छैन । अहिले नेपाल-अमेरिका मैत्री सम्बन्धको ७५औँ वर्षगाँठका अवसरमा उनले अमेरिकाको भ्रमण गर्न लागेका हुन् ।
