काठमाडौं । राष्ट्र बैङ्कका पूर्व गभर्नर दीपेन्द्रबहादुर क्षेत्रीले आर्थिक वर्ष २०७९-८० बजेट सोचे भन्दा राम्रो तर कार्यान्वयनमा चुनौती देखिएको बताउनुभएको छ ।
नेपाली रेडियो नेटवर्कसँग कुरा गर्दै पूर्व गभर्नर क्षेत्रीले आज प्रस्तुत गरिएको बजेटको आकार ठुलो भएका कारण कार्यान्वयनमा जटिलता देखिएको बताउनुभएको हो ।
अर्थमन्त्री जनार्दन शर्माले आज कृषि, शिक्षा, स्वास्थ्य र पर्यटनलाई विशेष प्राथमिकतामा राख्दै १७ खर्ब ९३ अर्ब ८३ करोड रुपैयाँको बजेट आकार प्रस्तुत गर्नुभएको छ ।
प्रदेश र सङ्घीय निर्वाचन नजिकिँदै गर्दा सरकारले बजेट बढाएको भन्दै उहाँले बजेटमा निर्वाचनको गन्धले कार्यान्वयनमा लैजान चुनौती रहेको बताउनुभयो ।
यस्तै कर्मचारी तथा सामाजिक सुरक्षा भत्ता समेत सरकारले बढाएको छ । यस प्रति पूर्व गभर्नर क्षेत्रीले नेपालको जस्तो कमजोर अर्थतन्त्र भएको देशले वितरणमुखी बजेट ल्याएको टिप्पणी पनि गर्नुभयो ।
