२०८३, भाद्र ७ गते
- यो साता चर्चामा :
काठमाडौं । चितवनको भरतपुर महानगरपालिकाकी नवनिर्वाचित मेयर रेनु दाहालले भारी मतान्तरले विजयी भएकोमा खुसी व्यक्त गरेकी छन् । भरतपुरका जनतालाई विशेष धन्यवाद दिँदै दाहालले आफ्नो कामको मुल्याङ्कन भएको बताइन् ।
विजयी भएपछि सञ्चारकर्मीसँग कुराकानी गर्दै दाहालले आफ्नो अनुमान ३ देखि अधिकतम ७ हजारसम्मको मतान्तरसहित विजयी हुने भएपनि त्यो भन्दा बढी मतान्तरसहित विजयी हुनु भनेको जनताको माया र विश्वासको कारण भएको बताइन् ।
उनले विगतका अधुरा कामहरु र जनताले गरेका अपेक्षा पुरा गर्नका लागि लागिपर्ने पनि बताइन् । जनउत्तरदायी भएर काम गर्ने प्रतिबद्धता जनाउँदै दाहालले भरतपुरलाई नमुना सहर बनाउने संकल्पलाई पुरा गरिछाड्ने दृढता पनि जनाइन् ।
उनले आउने दिनमा कहीँकतै आफ्नो ठाउँबाट सक्रियता र योगदानमा कमी हुन नदिने भन्दै बरु अनुभव प्राप्त भएकाले यहाँका आवश्यकता र प्राथमिकता पहिचान गरेर अघि बढिने बताइन् ।
मेयरका रुपमा आफ्नो अन्तिम कार्यकाल हुने भन्दै उनले यसलाई एक सेकेन्ड पनि खेर नफालीकन जनतालाई निराश हुन नदिने सो क्रममा बताइन् ।
