काठमाडौं । नेपाली कांग्रेसका वरिष्ट नेता रामचन्द्र पौडेलले प्रदेश र संघको निर्वाचनमा पनि चुनावी गठबन्धन हुने बताएका छन् ।

गृहनगर तनहुँको व्यासमा कांग्रेसले जितेपछि आयोजित विजय सभालाई सम्बोधन गर्दै नेता पौडेलले स्थानीय निर्वाचनले गठबन्धन र तालमेलको अपरिहार्यता पुष्टि गरेको बताए ।

उनले संविधान र मुलुकलाई जोगाएर समृद्धि र विकास हासिल गर्न अझै केही समय संविधान पक्षधरबीच सहकार्य जरुरी रहेको बताए ।

यस्तै नेता पौडेलले तनहुँका जनताले कोग्रेसलाई जिताएर लोकतन्त्र, संविधान र विकासको पक्षमा आफुलाई उभ्याएको समेत बताए ।

उनले स्थानीय चुनावमा विजयी प्रतिनिधिहरुलाई जनताको विश्वासलाई कहिल्यैँ टुट्न नदिई शासक होइन जनताको सेवक बनेर काम गर्न निर्देशन दिए ।