काठमाडौं । भारतका लागि पूर्व नेपाली राजदूत दिपकुमार उपाध्यायले नेपालको तर्फबाट कुटनीतिक कमजोरी भएको सरकारले महसुस गरेको बताउनुभएको छ ।

सरकारका उच्च अधिकारीहरुसँगका बैठक तथा कुराकानीका क्रममा आफुले गल्ती भएको महसुस नेपाल सरकारले पनि गरेको पाएको जानकारी दिनुभयो ।

नेपाली रेडियो नेटवर्कको नेपाली बहसमा उहाँले भन्नुभयो, “हाम्रो तर्फबाट पनि केही कमीकमजोरी भएका छन् । त्यो कुरा नेपाल सरकारकाले पनि महसुस गरेको छ । अव समस्याको समाधानका लागि बाटो खुल्नसक्छ ।”

उहाँले दुई देशका बीचमा विवाद हुनुमा भारतले पनि कहीँ न कहीँ आफ्नो गल्ती महसुस गरेको पाएको उहाँले बताउनुभयो । “नेपाल र भारतका बीचमा विवाद हुनु दुवै देशको कुटनीतिक असफलता हो, त्यसमा नेपालका प्रधानमन्त्री केपी ओली र भारतका प्रधानमन्त्री नरेन्द्र मोदीको कमजोरी देखिन्छ,” उहाँले भन्नुभयो ।

नेपालको तर्फबाट भारतसँगको सम्वन्धलाई ख्यालठट्टा गरेर विगारिएको उहाँको भनाई छ । पूर्व राजदूत उपाध्यायले पहिला पहिला दुई देशका बीचमा विवाद भइरहेका बेला पनि कुराकानी भइरहने गरेको स्मरण गर्दै अहिले भने त्यो पनि हुन नसकेको बताउनुभयो ।

नेपाल र भारतका बीचमा सम्वन्ध विग्रिदा भारतलाई भन्दा नेपाललाई बढी समस्या पर्ने र सरकारलाई भन्दा जनतालाई समस्या पर्ने उहाँको भनाई छ ।

नेपाल र नेपालीलाई बढी समस्या पर्ने भएकाले समाधानको प्रयास पनि नेपालकै तर्फबाट धेरै हुनु पर्नेमा उहाँले जोड दिनुभयो ।