काठमाडौं । प्रधानमन्त्री तथा मन्त्रीपरिषद्को कार्यालयका राज्यमन्त्री उमेश श्रेष्ठले जाडो विदालाई विद्यार्थीहरुका लागि खोप लगाउने अवसरको रुपमा सदुपयोग गर्न लागिएको स्पष्ट पार्नु भएको छ ।

अहिले सवै विद्यालयहरुले जाडो विदा दिने बेला भएकाले सवैले एकैचोटी जाडो विदा दिने र त्यस समयमा विद्यार्थी, शिक्षक र विद्यालय कर्मचारीहरुलाई खोप लगाउने समयको रुपमा उपयोग गर्न लागिएको उहाँको भनाई छ ।

नेपाली रेडियो नेटवर्कको नेपाली बहसमा पत्रकार ऋषि धमलासँगको कुराकानीका क्रममा उहाँले भन्नुभयो, “विद्यालयहरुले यसै पनि अहिले जाडो विदा दिने बेला भएको छ, त्यसलाई एकैचोटी गरौँ र त्यही बेलामा विद्यालयका सवैलाई खोप लगाउन खोजिएको हो ।”

विद्यालय तहका पढ्ने १२ बर्षदेखि १७ बर्षसम्मका विद्यार्थीहरुलाई आ आफ्ना विद्यालय र नजिकैको स्वास्थ्य संस्थामा खोप लगाउन पाइने व्यवस्था गर्न लागिएको उहाँले जानकारी दिनुभयो ।

लामो समयदेखि शिक्षा क्षेत्रमा काम गर्नु भएका शिक्षासेवी समेत रहनु भएका राज्यमन्त्री श्रेष्ठले शैक्षिक क्षेत्रका सरोकारवाला र विभिन्न क्षेत्रका विज्ञहरुको सल्लाहका आधारमा सिसिएमसीले विद्यालय बन्द गर्न सिफारिस गरेको बताउनुभयो ।

“१२ बर्षभन्दा कम उमेरका बालबालिकाहरुलाई खोप नलगाइएकाले उनीहरु सङ्क्रमणको उच्च जोखिममा छन, त्यसैले केही समय विद्यालय बन्द गर्नुपर्ने पक्षमा धेरैको जोड रहेको हो,” उहाँले भन्नुभयो ।

उहाँले यही माघ १ गतेदेखि १५ गतेसम्म १२ देखि १७ बर्षको उमेर समूहका सवै विद्यार्थीहरुलाई खोप लगाउनेगरी तयारी भरहेको र उनीहरुलाई पुग्नेगरी खोप रहेको पनि जानकारी दिनुभयो ।

खोप नलगाएकाहरुलाई मात्रै बन्द गर्न भनिएको र खोप लगाएकाहरुलाई कुनै पनि गतिविधिमा प्रतिवन्धीत नरहेको पनि उहाँले स्पष्ट पार्नुभयो ।

राज्य मन्त्री श्रेष्ठले भारतसँगको सिमानाबाट आवत जावत गर्नेहरुलाई पनि परीक्षण गरेर मात्रै आवत जावत गर्न दिने व्यवस्था गरिएकाले भारतबाट नेपालमा कोरोना सर्ने संभावना न्युन रहेको दावी गर्नुभयो ।